پرەزيدەنت ق ح ر مەملەكەتتىك كەڭەسى پرەمەرىنىڭ ورىنباسارى ليۋ گوجۋڭدى قابىلدادى
استانا. KAZINFORM - قاسىم-جومارت توقايەۆ قازاقستانعا رەسمي ساپارمەن كەلگەن قىتاي حالىق رەسپۋبليكاسى مەملەكەتتىك كەڭەسى پرەمەرىنىڭ ورىنباسارى ليۋ گوجۋڭدى قابىلدادى. بۇل تۋرالى اقوردانىڭ باسپا ءسوز قىزمەتى مالىمدەدى.
اڭگىمەلەسۋ بارىسىندا قازاق- قىتاي ستراتەگيالىق سەرىكتەستىگىنىڭ قازىرگى جاي-كۇيى مەن دامۋ پەرسپەكتيۆالارى، سونداي-اق بۇعان دەيىن پرەزيدەنت قاسىم-جومارت توقايەۆ پەن ق ح ر ءتوراعاسى شي جينپيڭ قول جەتكىزگەن ۋاعدالاستىقتاردى ەكى ەل ۇكىمەتتەرىنىڭ ىسكە اسىرۋ بارىسى تالقىلاندى.
مەملەكەت باسشىسىنىڭ ايتۋىنشا، قازاقستان قىتايدىڭ سەنىمدى سەرىكتەسى جانە سولاي بولىپ قالا بەرەدى. سونىمەن قاتار ق ح ر-مەن ەكىجاقتى قارىم-قاتىناستى مۇلدە جاڭا دەڭگەيگە كوتەرۋ ەلىمىز ءۇشىن ماڭىزدى باسىمدىق سانالادى.
- قازاقستان مەن قىتايدىڭ جان-جاقتى ستراتەگيالىق سەرىكتەستىگى مەن ماڭگىلىك دوستىعى ۇدايى دامىپ كەلەدى. ءبىز بولاشاققا سەنىممەن قارايمىز. مۇنى ەرەكشە اتاپ ءوتۋ كەرەك. ەكىجاقتى ساۋدا-ساتتىقتىڭ كولەمى بويىنشا كوش باستاپ تۇرعان قىتاي - قازاقستاننىڭ جەتەكشى ساۋدا- ەكونوميكالىق سەرىكتەسى. وتكەن جىلدىڭ قورىتىندىسى بويىنشا ەكى ەل اراسىنداعى تاۋار اينالىمى 40 ميلليارد دوللارعا جەتتى. بۇل - رەكوردتىق كورسەتكىش. ءبىز مۇنى 100 ميلليارد دوللارعا دەيىن جەتكىزۋدى كوزدەپ وتىرمىز. بۇل ماقساتقا قول جەتكىزۋگە بولادى، - دەدى مەملەكەت باسشىسى.
ليۋ گوجۋڭ قىتاي مەن قازاقستان اراسىنداعى ىنتىماقتاستىقتىڭ قارقىندى دامىپ كەلە جاتقانىن اتاپ ءوتتى.
- قىتاي حالقىنىڭ سىرالعى ءارى ىزگى نيەتتى دوسى رەتىندە ءسىز وسى جىلدار ىشىندە قىتاي مەن قازاقستان قاتىناستارىنىڭ دامۋىنا سۇبەلى ۇلەس قوستىڭىز. مۇنى قىتاي تاراپى جوعارى باعالايدى. ءسىزدىڭ باسشىلىعىڭىزبەن ەلىڭىز قۋاتتى، گۇلدەنگەن جاڭا قازاقستاندى قۇرۋ جولىندا ىلگەرىلەي بەرەتىنىنە سەنىمدىمىن. قىتاي مەن قازاقستان - تاتۋ كورشىلەر، سەنىمدى سەرىكتەستەر ءارى ءبىر-ءبىرىن تولىقتىراتىن دوستاس ەلدەر، - دەدى ليۋ گوجۋڭ.
كەزدەسۋ بارىسىندا ساۋدا، ينۆەستيتسيا، اۋىل شارۋاشىلىعى، كولىك-لوگيستيكا، ەنەرگەتيكا جانە تۋريزم سالالارىنداعى ىقپالداستىقتى نىعايتۋ پەرسپەكتيۆالارى قاراستىرىلدى. سونداي-اق مادەني-گۋمانيتارلىق بايلانىستاردى دامىتۋ ماسەلەلەرى تالقىلاندى.
اۆتور
باقىتگۇل اباي قىزى
