پرەزيدەنت گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتتەر ۇيىنە باردى
استانا. KAZINFORM - مەملەكەت باسشىسى ەۋرازيا ۇلتتىق ۋنيۆەرسيتەتىنىڭ ستۋدەنتتەرى مەن ماگيسترانتتارىنا جانە دوكتورانتتارىنا ارنالعان 2656 ورىندىق جاڭا جاتاقحانانى ارالاپ كوردى.
مەملەكەت- جەكەمەنشىك سەرىكتەستىگى نەگىزىندە سالىنعان ستۋدەنتتەر ءۇيى ءۇش زاماناۋي بلوكتان تۇرادى. ولاردىڭ ءارقايسىسى ستۋدەنتتەردىڭ جايلى تۇرمىسى مەن ءبىلىم الۋىنا مۇمكىندىك بەرەتىن كوۆوركينگ ايماقتارمەن، كىتاپحانالارمەن، سپورتتىق جانە كوممەرتسيالىق ورىندارمەن جابدىقتالعان.
جاتاقحانا قۇرىلىسىندا ەرەكشە قاجەتتىلىگى بار ستۋدەنتتەردىڭ دە تالاپ-تىلەگى ەسكەرىلگەن. ونىڭ ديزاينى مەن ينفراقۇرىلىمى كەدەرگىسىز ورتا قالىپتاستىرۋ تالاپتارىنا ساي كەلەدى.
عىلىم جانە جوعارى ءبىلىم ءمينيسترى پرەزيدەنتكە ستۋدەنتتەردى جاتاقحانامەن قامتاماسىز ەتۋ، ەلىمىزدە شەتەلدىك جوعارى وقۋ ورىندارىنىڭ فيليالدارىن اشۋ ارقىلى اكادەميالىق حاب قۇرۋ شارالارى جونىندە باياندادى.
قاسىم-جومارت توقايەۆ بۇل باعىتتا جۇرگىزىلىپ جاتقان جۇمىستاردى وڭ باعالاپ، ءبىلىم بەرۋ سالاسىنداعى جانە جاستار اراسىنداعى حالىقارالىق ىنتىماقتاستىقتىڭ ماڭىزدى ەكەنىنە نازار اۋداردى. سونداي-اق جۇرتتى الاڭداتقان مەتاپنەۆموۆيرۋس تۋرالى پىكىر ءبىلدىردى.
- قازىر ءبارى جاڭا ينفەكسيا تۋرالى ايتىپ جاتىر. مەنىڭشە، ودان داڭعازا جاساۋدىڭ قاجەتى جوق. سوندىقتان قىتايمەن ىنتىماقتاستىقتى ودان ءارى دامىتۋىمىز كەرەك، - دەدى مەملەكەت باسشىسى.
مەملەكەت باسشىسى جاتاقحانادا ستۋدەنتتەرمەن اڭگىمەلەسىپ، Ana tili گازەتىنە بەرگەن سۇحباتىندا ايتقانىنداي، ەلىمىزدە سيفرلاندىرۋ مەن جاساندى ينتەللەكتتى دامىتۋعا ەرەكشە ءمان بەرىلەتىنىن، بۇل وزىق تەحنولوگيالار ءار سالاعا ەنگىزىلەتىنىن جەتكىزدى. پرەزيدەنت بۇل رەتتە جاستارعا ايرىقشا ءۇمىت ارتاتىنىن اتاپ ءوتتى.
جالپى بىلتىر ەل اۋماعىندا 11079 ورىندىق 40 جاتاقحانا پايدالانۋعا بەرىلگەن. بيىل استانا قالاسىنىڭ وزىندە 3400 ورىندىق 7 جاتاقحانانى ىسكە قوسۋ جوسپارلانىپ وتىر.
بۇگىندە ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە 4280 ستۋدەنتكە ارنالعان سەگىز ستۋدەنتتەر ءۇيى بار. سونىمەن قاتار سەگىز جەكە جاتاقحانامەن ىنتىماقتاستىق تۋرالى مەموراندۋمدار جاسالعان. بيىل ستۋدەنتتەر ۇيلەرىندەگى ورىن سانى 10 مىڭعا دەيىن ۇلعايدى. بۇل ستۋدەنتتەردى جاتىن ورىنمەن قامتاماسىز ەتۋ ماسەلەسىن تولىعىمەن شەشۋگە مۇمكىندىك بەردى.
وسىعان دەيىن مەملەكەت باسشىسى QazSwimAcademy سپورت ورتالىعىنىڭ جۇمىسىمەن تانىستى.
