پرەزيدەنت مەملەكەتتىك ساياساتتىڭ نەگىزگى باعىتتارى بويىنشا كۇن ءتارتىبىن ايقىنداپ، باعدارىن ناقتىلاپ بەردى-قارين

  ەرلان قارين مەملەكەت باسشىسى قاسىم-جومارت توقايەۆتىڭ «egemen Qazaqstan» گازەتىنە بەرگەن سۇحباتىنا قاتىستى پىكىر ءبىلدىردى. مەملەكەتتىك كەڭەسشى پىكىرىن Telegram جەلىسىندە جاريالادى، دەپ حابارلايدى Kazinform.

«مەملەكەت باسشىسىنىڭ «egemen Qazaqstan» گازەتىندە جاريالانعان سۇحباتىنىڭ فورماتى اڭگىمەلەسۋ سيپاتىندا بولعانىمەن، كولەمى مەن مازمۇنى تۇرعىسىنان العاندا باعدارلامالىق ماقالا دەۋگە ابدەن بولادى. ويتكەنى سۇحبات قويىلعان سۇراق پەن بەرىلگەن جاۋاپتىڭ كوپتىگىمەن عانا ەمەس، قوعامدا قىزۋ تالقىلانىپ جاتقان كوكەيتەستى ماسەلەلەردى تۇتاستاي قامتىعانىمەن ەرەكشەلەنىپ تۇر. سولايشا، پرەزيدەنت مەملەكەتتىك ساياساتتىڭ نەگىزگى باعىتتارى بويىنشا كۇن ءتارتىبىن ايقىنداپ، باعدارىن ناقتىلاپ بەردى.

ءبىز ءۇشىن پرەزيدەنتتىڭ ىشكى ساياسات جانە يدەولوگيا سالاسىنا قاتىستى ايتقان وي-پىكىرى مەن بەلگىلەگەن باسىمدىقتارى اسا ماڭىزدى. مەملەكەت باسشىسى ءبىرقاتار باستاما مەن جوبانىڭ جاي-جاپسارىن جەتكىزىپ، اڭداتپا جاسادى.

- ۇلتتىق قۇرىلتايدىڭ كەزەكتى وتىرىسى وتەدى؛

- تۇرمىستىق زورلىق-زومبىلىققا قاتىستى جازانى قاتاڭداتۋ قولعا الىنادى؛

- 2024-جىلى وتەتىن ايتۋلى ءىس-شارالار مەن باسقا دا اتاۋلى كۇندەردىڭ بەت-بەينەسىن بەلگىلەدى.

قاسىم-جومارت توقايەۆتىڭ تاقىرىپقا شىعارىلعان «ءبىز وزىق ويلى ۇلت رەتىندە تەك قانا العا قاراۋىمىز كەرەك!» دەگەن ءسوزى بارلىق يدەيانىڭ وزەگى. جالپى العاندا، بۇل ءسوز پرەزيدەنت جۇرگىزىپ وتىرعان يدەولوگيالىق باعىتتىڭ شاعىن فورمۋلاسى. بۇل ءسوز قوعامدى جاسامپازدىققا جەتەلەيدى: وتكەن كۇنمەن ءومىر سۇرمەي، بولاشاققا نىق قادام باسۋعا ۇندەپ، حالىقتى بولەتىن ەمەس، بىرىكتىرەتىن جالپى ۇلتتىق قۇندىلىقتاردى باسشىلىققا الۋعا شاقىرادى»، - دەپ جازدى ەرلان قارين Telegram ارناسىنداعى پاراقشاسىندا.