پرەزيدەنت مالايزيا پرەمەر-ءمينيسترى انۋار يبراگيممەن كەلىسسوز جۇرگىزدى

استانا. KAZINFORM - مالايزيا دەلەگاتسياسىمەن كەڭەيتىلگەن قۇرامدا وتكەن كەلىسسوز بارىسىندا ءوزارا ءتيىمدى بايلانىستاردى ودان ءارى نىعايتۋعا باسا ءمان بەرىلىپ، ەكىجاقتى كۇن تارتىبىندەگى ءبىرقاتار وزەكتى ماسەلە قاراستىرىلدى، دەپ حابارلايدى اقوردانىڭ باسپا ءسوز قىزمەتى.

مەملەكەت باسشىسى قاسىم-جومارت توقايەۆ مەيماندارعا ءىلتيپات بىلدىرە وتىرىپ، پرەمەر-مينيستر انۋار يبراگيمنىڭ رەسمي ساپارىنىڭ شىن مانىندە تاريحي ءمانى بار ەكەنىن، ويتكەنى بۇل ەكى ەل اراسىنداعى ىنتىماقتاستىقتىڭ جاڭا كەزەڭىنە جول اشاتىنىن اتاپ ءوتتى.

- ءوز تاراپىمىزدان وڭتۇستىك-شىعىس ازيا وڭىرىندە اسا ماڭىزدى ءرول اتقاراتىن مالايزيامەن اناعۇرلىم تىعىز ءارى ناتيجەلى ىقپالداستىق جاساۋعا دايىن ەكەنىمىزدى جەتكىزگىم كەلەدى. جاڭا عانا ءبىز كوپتەگەن ماسەلە بويىنشا اشىق ءارى دوستىق راۋىشتە پىكىر الماستىق. ىنتىماقتاستىعىمىزدىڭ كەلەشەگى زور ەكەنىنە سەنىمدىمىن. ءسىزدىڭ بيزنەس-فورۋمعا قاتىسۋ نيەتىڭىزدى قۇپتايمىن. ىسكەرلىك توپتار اراسىنداعى بايلانىستار - ءوزارا قارىم-قاتىناستى دامىتۋدىڭ ماڭىزدى فاكتورى. ءبىز مالايزيالىق كومپانيالاردىڭ قاتىسى بار جاڭا تابىستى جوبالاردىڭ جۇزەگە اسىرىلۋىن قولدايمىز. بۇل رەتتە قازاقستان ۇكىمەتى قاجەتتى كومەك كورسەتۋگە دايىن. بۇدان بولەك، ەكى ەلدىڭ ازاماتتارى مەن بيزنەسمەندەرى 30 كۇندىك ۆيزاسىز رەجيمنىڭ جانە قولايلى تىكەلەي اۋە قاتىناسىنىڭ يگىلىگىن كورىپ وتىر. سونىمەن قاتار 500 دەن اسا قازاقستاندىق ستۋدەنت مالايزيا ۋنيۆەرسيتەتتەرىندە ءبىلىم الادى. ولار ەكى ەل اراسىنداعى «التىن كوپىر» قىزمەتىن اتقاراتىنى ءسوزسىز، - دەدى پرەزيدەنت.

انۋار يبراگيم مالايزيانىڭ قازاقستانمەن اراداعى ساۋدا-ەكونوميكالىق ىنتىماقتاستىقتى نىعايتۋعا ايرىقشا ءمان بەرەتىنىن ايتتى.

- ءبىز دامىپ كەلە جاتقان ەكونوميكالىق قاتىناستاردان بارىنشا پايدا تابا الامىز. ناقتى ۇسىنىستارىمىز بار. مينيسترلەرىڭىزبەن يمپورت جانە ەكسپورت ماسەلەلەرى جونىندە ەكىجاقتى كەزدەسۋ وتكىزۋدى جوسپارلاپ وتىرمىز. مالايزيانىڭ تاۋارلار نارىعى وراسان زور. قازىرگى كەزدە ءبىزدىڭ ەلىمىز كومپيۋتەر چيپتەرىن وندىرەتىن وڭىرلىك حابقا اينالدى. وعان ا ق ش، ەۋروپا ەلدەرى، ونىڭ ىشىندە گەرمانيا، سونداي-اق قىتاي اۋقىمدى ينۆەستيتسيا قۇيىپ وتىر. ءبىز ءوز تاجىريبەمىزبەن ءبولىسىپ، ءسىزدىڭ ەلدە تابىستى جۇزەگە اسىرىلعان وزگەرىستەردەن ۇلگى العىمىز كەلەدى. البەتتە، حالال-يندۋستريا سەكىلدى سالالار دا نازاردان تىس قالماۋى كەرەك. سونىمەن قاتار ءبىز يسلام-بانكينگىنىڭ پەرسپەكتيۆاسىن قاراستىرامىز، - دەدى مالايزيا پرەمەر-ءمينيسترى.

كەزدەسۋ بارىسىندا كولىك-ترانزيت، ەنەرگەتيكا، قارجى جانە مادەني-گۋمانيتارلىق سالالارداعى جان-جاقتى سەرىكتەستىكتىڭ مۇمكىندىكتەرى تالقىلاندى.

سونىمەن قاتار تاراپتار بۇۇ، يىۇ جانە اوسشك سەكىلدى حالىقارالىق قۇرىلىمدار اياسىنداعى ىنتىماقتاستىقتى نىعايتۋعا مۇددەلى ەكەنىن ءبىلدىردى.