پرەزيدەنت ماجارستان مەملەكەتتىك جينالىسىنىڭ ءتوراعاسىن قازاقستانعا شاقىردى

استانا. KAZINFORM - مەملەكەت باسشىسى قاسىم-جومارت توقايەۆ لاسلو كەۆەرمەن اڭگىمەلەسۋ بارىسىندا ءوزىنىڭ ماجارستانعا ساپارى ەكى ەلدىڭ سان قىرلى ىنتىماقتاستىعىن جاڭا بەلەسكە كوتەرەتىنىن ايتتى، دەپ حابارلايدى اقوردانىڭ باسپا ءسوز قىزمەتى.

بۇل ورايدا پرەزيدەنت ەكى ەلدىڭ پارلامەنتارالىق ىقپالداستىعى ماڭىزدى ءرول اتقاراتىنىن ەرەكشە اتاپ ءوتتى.

- قازاقستان مەن ماجارستاننىڭ زاڭ شىعارۋشى ورگاندارى اراسىنداعى قارىم-قاتىناستى جانداندىرۋدى قۇپتايمىن. بۇل قوس حالىقتىڭ ءوزارا تۇسىنىستىگىن نىعايتۋعا ىقپال ەتەدى دەپ سانايمىن. ورايلى ءساتتى پايدالانا وتىرىپ، ءسىزدى قازاقستانعا ساپارمەن كەلۋگە شاقىرامىن، - دەدى پرەزيدەنت.

قاسىم-جومارت توقايەۆ بۇل باعىتتاعى بىرلەسكەن ءىس-قيمىل ساۋدا-ەكونوميكالىق ارىپتەستىكتى كەڭەيتىپ، مادەني-گۋمانيتارلىق بايلانىستى تەرەڭدەتۋگە تىڭ سەرپىن بەرەتىنىنە سەنىم ءبىلدىردى.

مەملەكەت باسشىسى جوعارى ءبىلىم سالاسىنداعى قاتىناستاردى ارتتىرۋعا باسا ءمان بەردى.

- جاڭا عانا ماجارستاننىڭ جەتەكشى جوعارى وقۋ ورىندارىندا ءبىلىم الىپ جاتقان قازاقستاندىق ستۋدەنتتەرمەن كەزدەستىم. ءسىزدىڭ ەلىڭىزدە وقيتىن جانە ءبىلىم الۋعا نيەتتى جاستاردى ءاردايىم قولدايمىز. بۇل بايلانىستار ەلدەرىمىز اراسىنداعى «التىن كوپىرگە» اينالادى، - دەدى قاسىم-جومارت توقايەۆ.

بۇدان كەيىن قاسىم-جومارت توقايەۆ پەن لاسلو كёۆەر ماجارستان پارلامەنتىنىڭ عيماراتىن ارالاپ كوردى.

وسىعان دەيىن پرەزيدەنت ماجارستاندا ءبىلىم الىپ جاتقان قازاقستاندىق ستۋدەنتتەرمەن جۇزدەستى.