پرەزيدەنت لەگيونەرلەردى بيۋجەتتەن قارجىلاندىرۋعا تىيىم سالاتىن زاڭعا قول قويدى

استانا. KAZINFORM - زاڭ مەملەكەتتىڭ دەنە شىنىقتىرۋ جانە سپورت سالاسىن دامىتۋ ساياساتىن جەتىلدىرۋگە باعىتتالعان. بۇل تۋرالى اقوردانىڭ باسپا ءسوز قىزمەتى مالىمدەدى.

- مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنە شىنىقتىرۋ جانە سپورت، سونداي-اق ارتىق زاڭنامالىق رەگلامەنتتەۋدى بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى، - دەلىنگەن حابارلامادا.

زاڭ مەملەكەتتىڭ دەنە شىنىقتىرۋ جانە سپورت سالاسىن دامىتۋ ساياساتىن جەتىلدىرۋگە باعىتتالعان.

ۋاكىلەتتى ورگان باسىم سپورت تۇرلەرىنىڭ رەسپۋبليكالىق جانە وڭىرلىك تىزبەسىن ازىرلەيدى، جوعارعى جەتىستىكتەر سپورتى تۇرلەرىنىڭ ءتىزىمىن جانە ولاردى بيۋجەت ەسەبىنەن قارجىلاندىرۋ ءتارتىبىن ايقىندايدى.

باسىم سپورت تۇرلەرى حالىقارالىق ارەنادا قول جەتكىزگەن ناتيجەلەرگە قاراي بەكىتىلەدى. بۇل - وليمپيادا، پاراليمپيادا، سۋردليمپيادا، ازيا، پارازيا ويىندارىنىڭ باعدارلاماسىنا ەنگەن سپورت تۇرلەرى، سونداي-اق ۇلتتىق سپورت تۇرلەرى.

سپورت فەدەراتسيالارىن اككرەديتتەۋگە قاتىستى ەرەجەلەر جەتىلدىرىلدى. ەندى ولار ۇلتتىق جانە جەرگىلىكتى سپورت فەدەراتسيالارى بولىپ بولىنەدى.

شەتەلدىك لەگيونەرلەردى بيۋدجەتتەن جانە كۆازيمەملەكەتتىك سەكتور سۋبەكتىلەرىنىڭ قاراجاتى ەسەبىنەن قارجىلاندىرۋعا تىيىم سالىنادى.

بۇدان بىلاي بيۋجەت قاراجاتى تەك ءتورت باعىتقا: جوعارى جەتىستىكتەر سپورتىنا، ونىڭ ىشىندە سپورتتىڭ باسىم تۇرلەرىنە، مەملەكەتتىك دەنە شىنىقتىرۋ-سپورت ۇيىمدارىنىڭ قىزمەتىنە، بۇقارالىق سپورتقا، سپورتتىق ينفراقۇرىلىمدى دامىتۋعا جۇمسالادى.

زاڭعا «سپورتتىق دايارلىقتىڭ ۇلتتىق ستاندارتتارى» ۇعىمى ەنگىزىلەدى. سوعان سايكەس سپورتشىلاردى ءتول تانىم-تۇسىنىگىمىزگە ساي تاربيەلەپ، ولاردىڭ بويىنا ءداستۇرلى قۇندىلىقتاردى ءسىڭىرۋدى كوزدەيتىن ءبىرىڭعاي دايارلاۋ ستاندارتى ازىرلەنەدى.

ۋاكىلەتتى ورگانعا دوپينگكە قارسى ەرەجەلەردى بۇزعانى ءۇشىن شارا قابىلداۋ وكىلەتتىلىگى بەرىلەدى.

ايتا كەتەيىك، زاڭنىڭ ءماتىنى باسپا سوزدە جاريالانادى.

وسىعان دەيىن پرەزيدەنت ەۋرازيالىق دامۋ بانكىنىڭ باسقارما ءتوراعاسىن قابىلداعانى بەلگىلى بولدى.