پرەزيدەنت ۇلتتىق قاۋىپسىزدىك ورگاندارى قىزمەتىنىڭ باعىتتارى بويىنشا ءبىرقاتار تاپسىرما بەردى
استانا. KAZINFORM - مەملەكەت باسشىسى ۇلتتىق قاۋىپسىزدىك كوميتەتىنىڭ ءتوراعاسى ەرمەك ساعىمبايەۆتى قابىلدادى. بۇل تۋرالى اقوردانىڭ باسپا ءسوز قىزمەتى حابارلادى.
پرەزيدەنتكە ۆەدومستۆونىڭ جىل باسىنان بەرى اتقارعان جۇمىسىنىڭ ناتيجەسى مەن الداعى كەزەڭگە ارنالعان مىندەتتەرى جونىندە ەسەپ بەرىلدى.
مەملەكەت قاۋىپسىزدىگى
43 ادام لاڭكەستىك پەن ءدىني ەكسترەميزم بابى بويىنشا سوتتالعان جانە 34 ازامات تەرگەلىپ جاتىر، تەرروريزم مەن ەكسترەميزمگە قاتىسى بار 212 شەتەلدىكتىڭ قازاقستانعا كىرۋىنە جول بەرىلمەدى، راديكالدى ۇيىمدارعا مۇشە 1498 شەتەلدىك ادامنىڭ ەلىمىزگە كەلۋىنە شەكتەۋ قويىلدى. تەرروريستىك جانە ەكسترەميستىك قىلمىستار جاساعانى ءۇشىن ىزدەۋدە جۇرگەن 12 شەتەلدىك ازامات ۇستالدى.
قىلمىسقا قارسى كۇرەس
13 قىلمىستىق توپتىڭ قىزمەتى توقتاتىلىپ، ولاردىڭ 142 مۇشەسى ۇستالعان جانە 40 ازامات تۇتقىندالعان، زاڭسىز اينالىمدا جۇرگەن 282 اتىس قارۋى، 48 گراناتا مەن 4586 وق-ءدارى تاركىلەنگەن. ەسىرتكى وندىرەتىن 12 زەرتحانا، سونداي-اق 13 حالىقارالىق جانە 12 وڭىرلىك تاسىمال ارناسى جويىلعان. زاڭسىز اينالىمنان 3,2 توننا ەسىرتكى مەن پسيحوتروپتى زاتتار، 7,5 توننا پرەكۋرسورلار الىندى.
سىبايلاس جەمقورلىق
جەمقورلىق پەن قۇقىققا قايشى باسقا دا ارەكەت جاساعان مەملەكەتتىك جانە قۇقىق قورعاۋ ورگاندارىندا جۇمىس ىستەيتىن 15 لاۋازىمدى تۇلعا ۇستالدى، 1,6 تريلليوننان اسا تەڭگە كولەمىندە مەملەكەتكە كەلتىرىلەتىن زالالعا توسقاۋىل قويىلىپ، ونىڭ 220 ميلليارد تەڭگەسى قازىناعا قايتارىلدى.
شەكارا جانە كيبەرقاۋىپسىزدىك
شەكارانى بۇزعان 16 مىڭنان استام ادام ۇستالىپ، 3025 تۇلعا ەلدەن شىعارىلدى، قارۋ-جاراق پەن وق-ءدارى، ەسىرتكى جانە باسقا دا تىيىم سالىنعان زاتتاردى الىپ وتپەك بولعان 600 دەن اسا فاكتى اشكەرەلەندى، شەكارا ارقىلى 11 ميلليارد تەڭگە مەن قۇنى 16,6 ميلليارد تەڭگە بولاتىن تاۋارلاردى زاڭسىز الىپ وتۋگە جول بەرىلمەدى.
مەملەكەتتىك ورگانداردىڭ اقپاراتتىق جۇيەسىنە جاسالعان 796 ميلليون كيبەرشابۋىل اشكەرەلەنگەن.
پرەزيدەنت ۇلتتىق قاۋىپسىزدىك ورگاندارى قىزمەتىنىڭ باعىتتارى بويىنشا ءبىرقاتار تاپسىرما بەردى.
ايتا كەتەلىك بۇگىن مەملەكەت باسشىسى بالا قۇقىقتارى جونىندەگى ۋاكىل دينارا زاكيەۆانى قابىلداعان ەدى.
