پرەزيدەنت ۇلتتىق شۇعىل مەديتسينانى ۇيلەستىرۋ ورتالىعىنا باردى
استانا. KAZINFORM - مەملەكەت باسشىسى مەديتسينالىق اۆياتسيا جانە جەدەل جاردەم قىزمەتتەرىنىڭ، ناۋقاستاردى قابىلداۋ بولمەلەرىنىڭ جۇمىسىن ۇيلەستىرەتىن ورتالىقتىڭ قىزمەتىمەن تانىستى.
كەشەندە 250 ورىندىق ستاتسيونار بار، دەپ حابارلايدى اقوردانىڭ باسپا ءسوز قىزمەتى.
ۇلتتىق شۇعىل مەديتسينانى ۇيلەستىرۋ ورتالىعىنىڭ باسقارما ءتوراعاسى تيمۋر مۇراتوۆتىڭ ايتۋىنشا، مەكەمەدە 29 باعىت بويىنشا ەمدەۋ ءىسىن جۇرگىزەتىن 9 كلينيكالىق دەپارتامەنت قۇرىلادى. مۇندا جىلىنا 18 مىڭنان استام ناۋقاس ەمدەلە الادى.
پرەزيدەنت زاماناۋي قۇرالدارمەن، سونىڭ ىشىندە ءموبيلدى كومپيۋتەرلىك توموگراف جانە OR-1 جۇيەسىمەن جابدىقتالعان وپەراتسيا زالدارىن ارالاپ كوردى.
مەملەكەت باسشىسى ورتالىقتىڭ قىزمەتكەرلەرىمەن اڭگىمەلەسۋ بارىسىندا مۇنداي بىرەگەي نىساننىڭ ىسكە قوسىلۋىن وتاندىق مەديتسينانىڭ زور جەتىستىگى دەپ باعالادى. سونىمەن قاتار مەكەمەگە بىلىكتى مامانداردى كوپتەپ تارتۋ قاجەت ەكەنىنە نازار اۋداردى.
قاسىم- جومارت توقايەۆ ۇجىمنىڭ جۇمىسىنا تابىس تىلەپ، ورتالىققا رەانيموبيل سىيلادى.
وسىعان دەيىن مەملەكەت باسشىسى ۇلتتىق عىلىمي ونكولوگيا ورتالىعىنىڭ جاڭا كورپۋسىن ارالاپ كوردى.
