پرەزيدەنت ەلەنا رىباكينانى 25 كە تولعان تۋعان كۇنىمەن قۇتتىقتادى

 ورال. KAZINFORM - قازاقستان پرەزيدەنتى قاسىم-جومارت توقايەۆ تەننيستەن ۇلتتىق ايەلدەر قۇراماسىنىڭ كوشباسشىسى ەلەنا رىباكينانى تۋعان كۇنىمەن قۇتتىقتادى.

قازاقستان تەننيس فەدەراتسياسىنان ءمالىم ەتكەندەي، مەملەكەت باسشىسى سپورتشىعا قۇتتىقتاۋ حات جولدادى.

«ۋيمبلدونداعى جانە باسقا دا بەدەلدى حالىقارالىق جارىستا تاماشا جەڭىستەرىڭىزبەن قازاقستاندىق تەننيس تاريحى بەتتەرىنەن ويىپ ورىن الدىڭىز. الداعى ۋاقىتتا دا جانكۇيەردى كەرەمەت ويىنىڭىزبەن جانە جاڭا جەڭىستەرىڭىزبەن قۋانتىپ، دەنە شىنىقتىرۋ مەن سپورتتى دامىتۋعا جانە ىلگەرىلەتۋگە ۇلەس قوساتىنىڭىزعا سەنىمدىمىن. سىزگە زور دەنساۋلىق پەن قۇت-بەرەكە تىلەيمىن» دەلىنگەن وندا.

قازاقستاننىڭ ءبىرىنشى، الەمنىڭ 4-راكەتكاسى ە. رىباكينا بۇگىن 25 جاسقا تولدى.

بۇگىن - سونداي-اق قازاقستاننىڭ ەرلەر اراسىندا ءبىرىنشى، الەمنىڭ 17-راكەتكاسى الەكساندر بۋبليكتىڭ دە تۋعان كۇنى. ول 27 جاستىڭ بيىگىنە شىعىپ وتىر.

وسى اپتادا ە. رىباكينا بەرليندە، ا. بۋبليك گاللەدە ونەر كورسەتەدى.

ەسكە سالا كەتەيىك، بۇدان بۇرىن ەلەنا رىباكينانىڭ بەرليندە نيدەرلاندتاعى ءتۋرنيردىڭ چەمپيونىمەن كەزدەسۋى مۇمكىن ەكەنىن جازعان بولاتىنبىز.