پرەزيدەنت ەلەكتروۆوز قۇراستىرۋ زاۋىتىنىڭ جۇمىسىمەن تانىستى
استانا. KAZINFORM - مەملەكەت باسشىسى استانا قالاسىنىڭ 1-يندۋستريالىق پاركىندەگى ەلەكتروۆوز قۇراستىرۋ زاۋىتىن ارالاپ كوردى، دەپ حابارلايدى اقوردا.
كاسىپورىندى يندۋستريالاندىرۋ كارتاسى اياسىندا فرانسيانىڭ Alstom كومپانياسى ىسكە قوسقان.
قاسىم-جومارت توقايەۆقا كاسىپورىننىڭ جۇمىسى تۋرالى جان-جاقتى مالىمەت بەرىلدى. زاۋىتتا «قازاقستان تەمىر جولى» ۇلتتىق كومپانياسىنىڭ تاپسىرىسىمەن 380 جۇك جانە 70 جولاۋشىلار ەلەكتروۆوزى شىعارىلعان.
سونداي-اق ولاردىڭ قوسالقى بولشەكتەرى وندىرىلەدى. بۇدان بولەك، جۇك ەلەكتروۆوزدارىنىڭ 80 سەكسياسى ازەربايجانعا ەكسپورتتالعان. قازىر كاسىپورىن نارىققا لوكوموتيۆ كورپۋستارى، ترانسفورماتورلار، تومەن جانە جوعارى ۆولتتى شكافتار جانە باسقا دا ءونىم تۇرلەرىن ۇسىنادى.
پرەزيدەنتكە زاۋىتتا جاڭا بۋىن لوكوموتيۆىن قۇراستىرۋ جوباسى قولعا الىنعانى تۋرالى باياندالدى. ونىڭ وزىندىك قۇنى بۇرىنعى نۇسقاسىمەن سالىستىرعاندا 40 پايىزعا تومەن، ال تيىمدىلىگى 20 پايىزعا جوعارى. جاڭا جۇك ەلەكتروۆوزدارىنىڭ ءوندىرىسى 2028-جىلدان باستاپ ىسكە قوسىلادى. قازىر Alstom كومپانياسى استانا، الماتى، شۋ جانە ارىس قالالارىندا سەرۆيستىك ورتالىقتار اشۋعا ينۆەستيتسيا قۇيىپ جاتىر. بۇل 700 جاڭا جۇمىس ورنىن قۇرۋعا مۇمكىندىك بەرەدى.
بۇدان بولەك، مەملەكەت باسشىسى تەمىرجولعا قاجەتتى قۇرال-جابدىقتار شىعاراتىن وتاندىق كاسىپورىنداردىڭ ونىمدەرى كورمەسىن ارالادى. قازىر ەلىمىزدە 600 دەن استام كومپانيا تەمىرجول سالاسىنا ارنالعان بولشەكتەردى وندىرۋمەن اينالىسادى. ولاردىڭ ونىمدەرى مەن قىزمەتى 25 ەلگە ەكسپورتتالعان. ەلەكتروۆوز قۇراستىرۋ زاۋىتىندا ەڭبەك ەتەتىن جاس ماماندارمەن جۇزدەسۋدە پرەزيدەنت 2025-جىل «جۇمىسشى ماماندىقتار جىلى» بولىپ جاريالانعانىن ەسكە سالىپ، مەملەكەت ءوندىرىس سالاسىندا جۇمىس ىستەيتىن جاستارعا قولداۋ كورسەتە بەرەتىنىن ايتتى.
بۇعان دەيىن توقايەۆ مەتاپنيەۆموۆيرۋسكە قاتىستى پىكىر ءبىلدىردى.
