پرەزيدەنت ۇكىمەتكە «ارسەلورميتتالتەمىرتاۋ» كومپانياسىمەن ىنتىماقتاستىقتى توقتاتۋدى تاپسىردى
مەملەكەت باسشىسى قاراعاندى وبلىسىنداعى كوستەنكو اتىنداعى شاحتاداعى ورتتەن كەنشىلەردىڭ قازا تابۋىنا بايلانىستى ۇكىمەتكە «ارسەلورميتتالتەمىرتاۋ» كومپانياسىمەن ينۆەستيتسيالىق ىنتىماقتاستىقتى توقتاتۋدى تاپسىردى.
بۇل تۋرالى Kazinform اقوردانىڭ باسپا ءسوز قىزمەتىنە سىلتەمە جاساپ حابارلايدى.
قازاقستان پرەزيدەنتى قاسىم-جومارت توقايەۆ قاراعاندى وبلىسىنداعى كوستەنكو اتىنداعى شاحتاداعى ءورت سالدارىنان قازا تاپقان كەنشىلەردىڭ تۋعان-تۋىستارى مەن جاقىندارىنا كوڭىل ايتىپ، زارداپ شەككەندەردىڭ تەزىرەك ساۋىعىپ كەتۋىن تىلەدى.
مەملەكەت باسشىسى ۇكىمەتكە كەنشىلەردىڭ وتباسىلارىنا بارلىق قاجەتتى كومەك كورسەتۋدى تاپسىردى. وقيعانىڭ ءمان-جايىن انىقتاۋ ءۇشىن ۇكىمەتتىك كوميسسيا قۇرىلدى.
ايتا كەتەيىك، بۇگىن تاڭەرتەڭ كوستەنكو اتىنداعى شاحتادا ءورت بولىپ، 11 ادام كوز جۇمعانىن، ءارتۇرلى دارەجەدەگى جاراقاتتارمەن اۋرۋحاناعا 18 ادام جەتكىزىلگەنىن جازعان ەدىك. ارتىنشا تاعى بەس كەنشىنىڭ دەنەسى تابىلىپ، قۇربان بولعاندار سانى 16 عا جەتتى.
