پرەزيدەنت كەلەشەكتە اشىلاتىن ءىرى ءوندىرىس وشاقتارىن اتادى

استانا. KAZINFORM - پرەزيدەنت قاسىم-جومارت توقايەۆ ب ا ق سالاسى قىزمەتكەرلەرىن ماراپاتتاۋ راسىمىندە سويلەگەن سوزىندە شەتەلدىك ينۆەستورلاردىڭ قازاقستاندا قانداي ءوندىرىس وشاقتارىن اشاتىنىن ايتتى.

«كەيىنگى جىلدارى قازاقستاننىڭ ينۆەستيتسيالىق تارتىمدىلىعى ارتىپ كەلەدى. شەتەلدىك ينۆەستورلاردىڭ قاتىسۋىمەن ەلىمىزدە ەكونوميكانى ءارتاراپتاندىرۋعا جانە جاڭا جۇمىس ورىندارىن اشۋعا باعىتتالعان ءارى قارجىلاندىرۋ كولەمى ۇلكەن ونداعان، ءتىپتى جۇزدەگەن جوبا جۇزەگە اسىرىلىپ جاتىر. مىسالى، الماتى وبلىسىندا 2026 -جىلى الەمگە ايگىلى Pepsico كومپانياسىنىڭ ورتالىق ازياداعى ەڭ ءىرى زاۋىتى اشىلادى. بيىل شىمكەنتتە تۇركيالىق سەرىكتەستەرمەن بىرلەسىپ، ءىرى جىلىجاي كەشەنى قۇرىلىسىنىڭ ءبىرىنشى كەزەڭىن اياقتاۋ جوسپارلانىپ وتىر. قىتايلىق ارىپتەستەرمەن اباي وبلىسىندا جىلىنا 300 مىڭ توننا مىس قورىتاتىن زاۋىت سالۋ تۋرالى كەلىسىمگە قول جەتكىزىلدى. جوبانىڭ باستاپقى قۇنى - 1,5 ميلليارد دوللار، مىڭنان استام جاڭا جۇمىس ورنى اشىلادى»، - دەدى قاسىم- جومارت توقايەۆ.

مەملەكەت باسشىسى اتىراۋ وبلىسىندا پوليەتيلەن شىعاراتىن ينتەگراتسيالانعان گاز- حيميا كەشەنىن سالۋ جوسپاردا بار ەكەنىن ەسكە سالدى.

«مەنىڭ تاپسىرماممەن ۇكىمەت ەلىمىزدىڭ باتىس ايماقتارىن الەۋمەتتىك- ەكونوميكالىق تۇرعىدان دامىتۋ ءۇشىن جەدەل شارالار توپتاماسىن ازىرلەپ جاتىر. ونىڭ ناتيجەسى كوپ كۇتتىرمەيدى دەپ ويلايمىن»، - دەدى پرەزيدەنت.