پرەزيدەنت كاسىپقوي بوكسشى جانىبەك ءالىمحان ۇلىن جەڭىسىمەن قۇتتىقتادى
استانا. KAZINFORM - مەملەكەت باسشىسى كاسىپقوي بوكسشى جانىبەك ءالىمحان ۇلىن ورتا سالماقتا WBO جانە IBF تۇجىرىمدارى بويىنشا چەمپيوندىق بەلبەۋلەرىن ءساتتى قورعاۋىمەن قۇتتىقتادى.
بۇل تۋرالى پرەزيدەنتتىڭ باسپا ءسوز حاتشىسى رۋسلان جەلدىباي Telegram-ارناسىندا حابارلادى.
- قاسىم-جومارت توقايەۆ سپورتشىنىڭ جوعارى دەڭگەيدەگى شەبەرلىگى مەن تاباندىلىعى، تۋعان جەرىمىزدە ەل نامىسىن ابىرويمەن قورعاۋى بارشامىز ءۇشىن زور ماقتانىش ەكەنىن اتاپ ءوتتى. پرەزيدەنت جانىبەكتىڭ بۇدان دا ۇلكەن جەڭىستەرگە جەتە بەرۋىنە تىلەكتەستىك ءبىلدىردى، - دەلىنگەن حابارلامادا.
ەسكە سالساق، بۇگىن «بارىس ارەنا» مۇز سارايىندا وتاندىق جانە شەتەلدىك بوكس جۇلدىزدارىنىڭ قاتىسۋىمەن ۇلكەن تاريحي بوكس كەشى ءوتىپ جاتىر.
كەشتىڭ باستى جەكپە- جەگىندە ەل تاريحىندا العاش رەت IBF جانە WBO تۇجىرىمى بويىنشا ورتا سالماقتاعى الەم چەمپيونى جانىبەك ءالىمحان ۇلى (16-0، 11 ك و) ءوز بەلبەۋىن فرانتسيادان كەلگەن ۇمىتكەر اناۋەل نگاميسسينگەگە (14-0 ، 9 ك و) قارسى قورعايتىنى حابارلاندى.
بۇگىن جانىبەك ءالىمحان ۇلى قارسىلاسىن نوكاۋتپەن جەڭىپ، چەمپيوندىق بەلدىكتەرىن ءساتتى قورعاپ شىقتى.
