پرەزيدەنت جولداۋىن ىسكە اسىرۋ: ۇكىمەت بيزنەستى قولداۋ شارالارىن قايتا قارادى

استانا. KAZINFORM - مەملەكەت باسشىسىنىڭ «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا جولداۋىندا قويعان تاپسىرماسىن ورىنداۋ ماقساتىندا ۇكىمەت «بيزنەستىڭ جول كارتاسى» جانە «قاراپايىم زاتتار ەكونوميكاسى» باعدارلامالارىن بىرىكتىرگەن شاعىن جانە ورتا كاسىپكەرلىكتى قولداۋ مەن دامىتۋعا ارنالعان كەشەندى باعدارلامانى ازىرلەپ، قابىلدادى.

كاسىپكەرلىكتى دامىتۋ سالاسىندا مەملەكەت جۇرگىزىپ وتىرعان ساياساتتىڭ قازىرگى كۇن ءتارتىبى مەن مىقتى، باسەكەگە قابىلەتتى كاسىپورىندار قۇرۋ قاجەتتىگىن ەسكەرە وتىرىپ، جاڭا باعدارلاما اياسىندا ءتيىمدى جوبالارعا قولداۋ كورسەتۋ كوزدەلگەن. سونىمەن قاتار جاڭا جوبالاردى سۋبسيديالاۋ ءۇشىن بيۋجەتتى ءبولۋ نەگىزىنەن وڭدەۋ ونەركاسىبى سالاسىنداعى (شامامەن %50) كاسىپورىندار اراسىندا جۇزەگە اسىرىلادى.

سونداي-اق بيۋجەتكە تۇسەتىن جۇكتەمەنى ازايتۋ ءۇشىن قىزمەت كورسەتۋ سالاسىنداعى جوبالاردى سۋبسيديالاۋ مەرزىمى 5 جىلدان 3 جىلعا دەيىن قىسقارتىلدى. شوب جوبالارىن سۋبسيديالاۋدىڭ سارالانعان ءادىسى قاراستىرىلعان، بۇل كەزەڭ- كەزەڭىمەن نارىقتىق جاعدايلارعا كوشىرۋدى كوزدەيدى. سۋبسيديالاۋعا جاتاتىن جەكەلەگەن قىزمەت سالالارى وڭتايلاندىرىلدى.

نەسيەلەر بويىنشا كەپىلدىك بەرۋ قۇرالى كەڭەيتىلدى، اتاپ ايتقاندا، كەپىلدىكتەر سومالارى ۇلعايتىلدى، بيزنەس سۋبەكتىلەرىنە 1 ميلليارد تەڭگەدەن اساتىن نەسيە سومالارىنا نارىقتىق شارتتار بويىنشا كەپىلدىك الۋ مۇمكىندىگى بەرىلدى.

بۇعان قوسا، باعدارلامادا مەملەكەتتىك قولداۋدىڭ بالامالى قۇرالى رەتىندە سينديكاتتالعان نەسيەلەۋ قاراستىرىلعان، ول ءبىر مەزگىلدە بىرنەشە بانك ارقىلى 15 ميلليارد تەڭگەگە دەيىن ءىرى جوبالاردى قارجىلاندىرۋدى كوزدەيدى.

سونداي-اق وبليگاتسيالىق قارىزدار بەرۋ شارتتارى ەداۋىر كەڭەيتىلدى. ماسەلەن، ەميتەنت-كاسىپكەر وبليگاتسيا شىعارۋ كەزىندە كۋپوندىق سىياقى مولشەرلەمەسىنە سۋبسيديا الىپ، 5 جىل مەرزىمگە دەيىن %6 مولشەرلەمەمەن 5 ميلليارد تەڭگەگە دەيىن قارجىلاندىرۋدى تارتا الادى.

بيىلعى 6 ايدا جاڭارتىلعان باعدارلاما اياسىندا سۋبسيديالار مەن كەپىلدىكتەر تۇرىندەگى قولداۋ شارالارىمەن قازاقستاندا شامامەن 14 مىڭ بيزنەس جوباسى قامتىلدى: سۋبسيديالاۋ بويىنشا - 566 ميلليارد تەڭگەگە 8624 جوبا، كەپىلدىك بەرۋ بويىنشا - 178,9 ميلليارد تەڭگەگە 5381 جوبا.

جاقىن ارادا ءوندىرىستىڭ تەحنولوگيالىق كۇردەلىلىگىنە قاراي مەملەكەتتىك قولداۋدىڭ سارالانعان تەتىكتەرىن ەنگىزۋ جوسپارلانۋدا. جوعارى تەحنولوگيالىق دايىن ءونىم شىعاراتىن كاسىپكەرلەر ءۇشىن قولداۋ شارالارى ۇزاق مەرزىمگە ارزانداتىلعان نەسيە بەرۋدى قامتيتىن بولادى.

اتالعان تەتىكتەر بيزنەستى ماقساتتى ءارى ءتيىمدى قولداۋدى قامتاماسىز ەتۋگە مۇمكىندىك بەرەدى، بۇل، ءوز كەزەگىندە، تۇراقتى ەكونوميكالىق وسىمگە جانە ەلىمىزدىڭ باسەكەگە قابىلەتتىلىگىن ارتتىرۋعا ىقپال ەتەدى.