پرەزيدەنت جانىنداعى ۇلتتىق قوردى باسقارۋ كەڭەسىنىڭ مىندەتتەرى كەڭەيتىلەدى

استانا. KAZINFORM - «ۇلتتىق ەكونوميكا مينيسترلىگى ۇلتتىق قوردى باسقارۋ جونىندەگى كەڭەستىڭ كەيبىر ماسەلەلەرى تۋرالى» پرەزيدەنت جارلىعىنىڭ جوباسىن كوپشىلىك تالقىلاۋىنا شىعاردى.

جاڭا رەداكسيا بويىنشا ۇلتتىق قور قاراجاتىن وبليگاتسيالىق قارىزدار نىسانىندا پايدالانۋ جونىندەگى ماسەلەلەر قارالعان جاعدايدا ۇسىنىستار ازىرلەۋ تەك جالپىحالىقتىق ماڭىزى بار جوبالاردى ساراپتاۋ ناتيجەلەرى نەگىزىندە عانا جۇزەگە اسىرىلادى.

سونداي-اق، كەڭەستىڭ مىندەتتەرىنە جاڭا ەكى تارماق قوسىلىپ وتىر. ولار:

- قازاقستان رەسپۋبليكاسىنىڭ ۇلتتىق قورىنان رەسپۋبليكالىق بيۋجەتكە كەپىلدەندىرىلگەن ترانسفەرتتىڭ مولشەرىن ايقىنداۋ جونىندە ۇسىنىستار ازىرلەۋ.

- قارجىلاندىرۋدىڭ بالامالى كوزدەرى بولماعان كەزدە اسا ماڭىزدى وبەكتىلەر مەن جالپىحالىقتىق ماڭىزى بار جوبالاردى ايقىنداۋ جونىندە ۇسىنىستار ازىرلەۋ.

قۇجات پرەزيدەنتتىڭ 11 جارلىعىنىڭ كۇشىن جويۋدى دا كوزدەيدى.

بۇل وزگەرىستەر بيۋدجەت كودەكسى 5-بابىنىڭ 16-تارماعىنىڭ تالاپتارىنان تۋىنداپ وتىرعانىن ايتۋ كەرەك.

ال ۇلتتىق قوردى باسقارۋ جونىندەگى پرەزيدەنت جانىنداعى كونسۋلتاتيۆتىك-كەڭەسشى ورگاننىڭ قۇرامى وزگەرىسسىز قالماق. ولار:

قازاقستان رەسپۋبليكاسىنىڭ پرەزيدەنتى - كەڭەس ءتوراعاسى؛

سەنات ءتوراعاسى (كەلىسىم بويىنشا)؛

ءماجىلىس ءتوراعاسى (كەلىسىم بويىنشا)؛

پرەزيدەنتى اكىمشىلىگىنىڭ باسشىسى؛

ۇلتتىق بانك ءتوراعاسى؛

جوعارى اۋديتورلىق پالاتا ءتوراعاسى؛

قارجى ءمينيسترى؛

ۇلتتىق ەكونوميكا ءمينيسترى.

بۇعان دەيىن ۇلتتىق قوردان بولىنگەن قاراجاتتىڭ جۇمسالۋىن مونيتورينگتەۋ جونىندەگى كوميسسيا جۇمىسىن قايتا باستاعانى حابارلانعان ەدى.