پرەزيدەنت حالىقارالىق سەرىكتەستىك جونىندەگى ەۋروپالىق كوميسسار يوزەف سيكەلانى قابىلدادى
استانا. KAZINFORM - قاسىم-جومارت توقايەۆ ەۋروپا وداعىنىڭ جوعارى مارتەبەلى وكىلىنە ءىلتيپات بىلدىرە وتىرىپ، ەلىمىز ماڭىزدى سىرتقى ەكونوميكالىق جانە ينۆەستيتسيالىق سەرىكتەس رەتىندە ۇيىممەن جان-جاقتى ستراتەگيالىق ىنتىماقتاستىققا باسىمدىق بەرەتىنىن ايتتى.
- قازاقستان ەۋروپا وداعىنىڭ ورتالىق ازياداعى نەگىزگى ارىپتەسى بولىپ قالا بەرەدى. سەرىكتەستىكتى كەڭەيتۋ جانە ىنتىماقتاستىق تۋرالى كەلىسىم ءبىزدىڭ كوپ جوسپارلى ءوزارا ىقپالداستىعىمىزدى تەرەڭدەتۋدىڭ بەرىك نەگىزىن قالايدى، - دەدى مەملەكەت باسشىسى.
يوزەف سيكەلا كەزدەسۋ ءۇشىن پرەزيدەنتكە ريزاشىلىعىن جەتكىزىپ، ەۋروپا وداعى ايماققا ايرىقشا نازار اۋدارىپ وتىرعانىن اتاپ ءوتتى.
- حالىقارالىق سەرىكتەستىك جونىندەگى كوميسسار رەتىندە العاشقى ساپارىما باسا ءمان بەرەمىن. ورتالىق ازيانىڭ بەس ەلىنە كەلۋ جونىندە شەشىم قابىلداۋىم بەكەر ەمەس. بۇل - ەۋروپا وداعىنىڭ قازاقستانمەن جانە ايماقتىڭ باسقا مەملەكەتتەرىمەن اناعۇرلىم تەرەڭ ءارى ورنىقتى بايلانىس ورناتۋعا نيەتتى ەكەنىن ايقىن كورسەتەدى، - دەدى ەۋروكوميسسار.
قاسىم-جومارت توقايەۆ پەن يوزەف سيكەلا كولىك دالىزدەرىن، لوگيستيكالىق ينفراقۇرىلىمدى، ورنىقتى ەنەرگەتيكا مەن سيفرلىق شەشىمدەردى دامىتۋ بويىنشا قازىرگى ۋاقىتتا جۇزەگە اسىرىلىپ جاتقان جانە جاڭا ەكونوميكالىق جوبالارعا دەن قويا وتىرىپ، ەكىجاقتى كۇن ءتارتىبىنىڭ ناقتى ماسەلەلەرىن تالقىلادى.
سونىمەن قاتار وڭىرلىك جانە جاھاندىق وزەكتى ماسەلەلەر جونىندە پىكىر الماسىپ، حالىقارالىق ارەناداعى، سونىڭ ىشىندە «ورتالىق ازيا - ەۋروپا وداعى» فورماتى اياسىندا ءادىس-تاسىلدەردى ودان ءارى ۇيلەستىرۋگە دايىن ەكەندىكتەرىن راستادى.
ايتا كەتەيىك، پرەزيدەنت استانا ينفراقۇرىلىمىن باسقارۋدا АІ پايدالانۋدى قولدايدى.
