پرەزيدەنت حالىقارالىق دزيۋدو فەدەراتسياسىنىڭ (IJF) پرەزيدەنتى ماريۋس ۆيزەردى قابىلدادى

استانا. KAZINFORM - مەملەكەت باسشىسى حالىقارالىق دزيۋدو فەدەراتسياسىنىڭ (IJF) پرەزيدەنتى ماريۋس ۆيزەردى قابىلدادى، دەپ حابارلايدى اقوردانىڭ باسپا ءسوز قىزمەتى.

قاسىم-جومارت توقايەۆ ماريۋس ۆيزەرگە دزيۋدونى دامىتۋعا جانە ناسيحاتتاۋعا ۇلەس قوسقانى ءۇشىن ريزاشىلىق ءبىلدىردى. پرەزيدەنتتىڭ ايتۋىنشا، قازاقستاندا سپورتتىڭ وسى تۇرىنە قىزىعۋشىلىق زور. اسىرەسە، بالالار مەن جاستار اراسىندا تانىمالدىلىققا يە.

- ءسىزدىڭ ساپارىڭىز قازاقستان مەن حالىقارالىق دزيۋدو فەدەراتسياسى اراسىنداعى ءوزارا ىقپالداستىققا تىڭ سەرپىن بەرۋ تۇرعىسىنان وتە ماڭىزدى دەپ سانايمىن. بۇگىندە دزيۋدونىڭ الەمدىك سپورت قوعامداستىعىندا الاتىن ورنى زور. دزيۋدو قازاقستاندا دا وتە تانىمال سپورت ءتۇرى. ەلىمىزدە كوپتەگەن سەكسيا مەن جاتتىعۋ ورتالىقتارى جۇمىس ىستەيدى. وندا 160 مىڭنان اسا ادام، سولاردىڭ ىشىندە بالالار دا جاتتىعادى. جاقىندا وتكەن پاريج وليمپياداسىندا ەلدوس سمەتوۆتىڭ جەڭىمپاز اتانعانىن ماقتان تۇتامىز. سوندىقتان ءبىز حالىقارالىق دزيۋدو فەدەراتسياسىمەن قارىم-قاتىناستى وركەندەتىپ، ىنتىماقتاستىقتى جانداندىرۋعا نيەتتىمىز، - دەدى مەملەكەت باسشىسى.

ماريۋس ۆيزەر قازاقستاندا دزيۋدونى دامىتۋعا قولداۋ كورسەتكەنى ءۇشىن قاسىم-جومارت توقايەۆقا العىس ايتتى.

- قازاقستانعا كەلۋ - مەن ءۇشىن ۇلكەن مارتەبە. سىزگە جانە ەلىڭىزگە دزيۋدوعا عانا ەمەس، الەۋمەتتىك ينتەگراتسيانىڭ جانە بەيبىتشىلىكتىڭ بىردەن-ءبىر تەتىگى سانالاتىن سپورتتىق قوزعالىسقا قولداۋ كورسەتكەنىڭىزگە ريزاشىلىعىمدى بىلدىرەمىن. دزيۋدو قاۋىمداستىعىنىڭ بارلىق مۇشەسى ورتاق ماقساتقا جۇمىلادى. بۇل - قوعامدا لايىقتى ورنى بار ازامات تاربيەلەۋ، - دەدى ماريۋس ۆيزەر.

ول استانادا حالىقارالىق دزيۋدو فەدەراتسياسىنىڭ ۇيىتقى بولۋىمەن IJF اكادەمياسىن اشۋ جوسپارلانىپ وتىرعانىن جەتكىزدى. بۇل ايماقتاعى جوعارى ساناتتى جاتتىقتىرۋشىلار مەن تورەشىلەردى دايارلايتىن ورتالىقتاردىڭ ءبىرى بولماق.

قاسىم-جومارت توقايەۆ پەن ماريۋس ۆيزەر قازاقستاننىڭ حالىقارالىق دزيۋدو فەدەراتسياسىمەن ۇزاقمەرزىمدى ىنتىماقتاستىعىنىڭ پەرسپەكتيۆاسى جونىندە پىكىر الماستى. بۇدان بولەك، 2027-جىلى ەلىمىزدە وتەتىن دزيۋدودان الەم چەمپيوناتىنا دايىندىق ماسەلەلەرىن پىسىقتادى.

كەزدەسۋ سوڭىندا مەملەكەت باسشىسى قازاقستاندا دزيۋدونى ىلگەرىلەتۋگە قوسقان ۇلەسى ءۇشىن ماريۋس ۆيزەردى Ⅱ دارەجەلى «دوستىق» وردەنىمەن ماراپاتتادى.

وسىعان دەيىن قازاقستانعا رەسمي ساپارمەن كەلگەن حالىقارالىق دزيۋدو فەدەراتسياسىنىڭ (IJF) پرەزيدەنتى ماريۋس ۆيزەر ەلورداداعى سپورت نىساندارىن ارالاپ، جۇمىس بارىسىمەن تانىسقانىن جازدىق.