پرەزيدەنت حالىقارالىق ارالدى قۇتقارۋ قورى اتقارۋشى كوميتەتىنىڭ ءتوراعاسى اسحات ورازبايدى قابىلدادى

  استانا. KAZINFORM — كەزدەسۋ بارىسىندا مەملەكەت باسشىسىنا قوردىڭ قىزمەتى مەن ونىڭ الداعى جىلدارى، ياعني، قازاقستاننىڭ ۇيىمعا ءتوراعالىعى كەزىندە اتقاراتىن مىندەتتەرى جونىندە مالىمەت بەرىلدى.

قاسىم-جومارت توقايەۆ حالىقارالىق ارالدى قۇتقارۋ قورىنىڭ قۇرىلتايشى مەملەكەتتەرى اراسىنداعى ءوزارا ىقپالداستىقتى كۇشەيتۋ قاجەت ەكەنىن اتاپ ءوتتى. سونىڭ ىشىندە ورتالىق ازياداعى سۋ-ەنەرگەتيكا رەسۋرستارىن ءتيىمدى پايدالانۋ، ارال تەڭىزى باسسەينىندەگى سۋ رەسۋرستارىن ەسەپتەيتىن، مونيتورينگ جۇرگىزەتىن، باسقاراتىن جانە ءوزارا بولەتىن ءبىرىڭعاي اۆتوماتتاندىرىلعان جۇيەنى ەنگىزۋ ءۇشىن ىنتىماقتاستىقتىڭ وڭىرلىك تەتىكتەرىن قۇرۋ ماسەلەلەرىنە باسا نازار اۋدارۋ كەرەك ەكەنىن ايتتى.