پرەزيدەنت شىڭعىس حان ۇلتتىق مۋزەيىنە باردى
ۇلان-باتىر. KAZINFORM - قازاقستان پرەزيدەنتى موڭعولياعا مەملەكەتتىك ساپارى اياسىندا ۇلان-باتىر قالاسىنداعى شىڭعىس حان ۇلتتىق مۋزەيىن ارنايى بارىپ كوردى، دەپ حابارلايدى اقوردا.
2019-جىلى اشىلعان مۋزەي قورىندا 10 مىڭنان استام بىرەگەي جادىگەر بار. ەكسپوزيتسيانىڭ نەگىزگى بولىگى ۇلى قولباسشى ءارى جيھانگەر شىڭعىس حان تۇلعاسىنا ارنالعان. بۇدان بولەك كورمەدە عۇن داۋىرىنەن باستاپ XX عاسىرعا دەيىنگى موڭعول مەملەكەتىنىڭ قالىپتاسۋ كەزەڭدەرىن تولىق قامتيتىن ارتەفاكتىلەر قويىلعان.
مۋزەيدىڭ تاعى ءبىر ماڭىزدى مىندەتى - ەۋرازيا حالىقتارىنىڭ كوشپەلى وركەنيەتى مەن مادەني مۇراسىن زەرتتەۋ جانە ونى جان-جاقتى دارىپتەۋ.مەملەكەت باسشىسى مۋزەيدى ارالاپ كورىپ، قۇرمەتتى قوناقتار كىتابىنا: «شىڭعىس حان ۇلتتىق مۋزەيى - ۇلى تۇلعانىڭ جانە تۇتاس مەملەكەتتىڭ شەجىرەسى. رۋحانيات ورداسى ەل يگىلىگىنە قىزمەت ەتە بەرسىن. موڭعوليا حالقىنىڭ مەرەيى ۇستەم بولسىن!» دەپ جىلى لەبىزىن قالدىردى.
ەسكە سالساق، 28-29-قازان كۇندەرى پرەزيدەنت قاسىم-جومارت توقايەۆ موڭعولياعا مەملەكەتتىك ساپارمەن باراتىنىن حابارلادىق.
مەملەكەت باسشىسى پرەزيدەنت ۋحنااگيين حۋرەلسۋحپەن كەلىسسوز جۇرگىزەدى. سونداي-اق موڭعوليانىڭ ۇلى مەملەكەتتىك حۋرالىنىڭ ءتوراعاسى داشزەگۆين امارباياسگالانمەن جانە پرەمەر-مينيستر لۋۆساننامسراين ويۋۋن-ەردەنەمەن كەزدەسەدى. مىڭداعان جىلدارعا سوزىلعان تاريحي بايلانىسى بار ەكى حالىقتىڭ قازىر ءتۇرلى سالاداعى قارىم-قاتىناسى جاقسى دەڭگەيدە. ەكى ەل باسشىسىنىڭ كەزەكتى كەزدەسۋىندە ساياسي جانە ەكونوميكالىق بايلانىستاردى نىعايتۋ جايى تالقىلانىپ، ءبىرقاتار كەلىسسوز ءوتۋى مۇمكىن ەكەنى ايتىلدى.
سونىمەن قاتار قازاقستان مەن موڭعولياعا اراسىنداعى ۇزاق جىلعى بايلانىس تۋرالى Kazinform ءتىلشىسىنىڭ ماتەريالىنان وقۋعا بولادى.
