پرەزيدەنت شەنەۋنىكتەرگە قانداي تالاپ قوياتىنىن ايتتى
مەملەكەت باسشىسى قاسىم-جومارت توقايەۆ Egemen Qazaqstan گازەتىنە بەرگەن سۇحباتىندا كادر ساياساتىندا قانداي قاعيداتقا سۇيەنەتىنىن ايتىپ بەردى، دەپ حابارلايدى Kazinform.
سۇحبات الۋشى ديحان قامزابەك ۇلى پرەزيدەنتتەن كادر ساياساتىندا قانداي قاعيداتقا سۇيەنەتىنىن، قول استىنداعى قىزمەتكەرلەرمەن قارىم-قاتىناسى قانداي ەكەنىن سۇرادى.
«مەملەكەتتىك قىزمەتشىلەر وزىنە جۇكتەلگەن مىندەتتى ءمىنسىز اتقاراتىن كاسىبي مامان عانا بولماۋى كەرەك. ولار ءاردايىم باستاماشىل، ناقتى ىسىمەن ەلگە پايدا اكەلەتىن جانە وزگەرىستەردىڭ ومىرشەڭدىگىن حالىققا كورسەتە الاتىن ازامات بولۋى قاجەت. سونداي-اق ولار ءبىلىمدى-بىلىكتى عانا ەمەس، ءسوزى مەن ءىسى ۇيلەسەتىن، تياناقتى، ءتارتىپتى جانە ارلى ادام بولۋى شارت»، - دەپ جاۋاپ بەردى قاسىم-جومارت توقايەۆ.
سونداي-اق، پرەزيدەنت قاراماعىندا قىزمەت ىستەيتىن ازاماتتاردىڭ وزىنە ەمەس، ادىلەتتى قازاقستاندى قۇرۋ يدەياسىنا ادالدىعى الدەقايدا ماڭىزدى ەكەنىن باسا ايتتى.
«بارلىق دەڭگەيدەگى شەنەۋنىكتەر مەن باسشىلار قوعامنىڭ تامىرىن تاپ باسا بىلۋگە، ازاماتتاردىڭ مۇڭ-مۇقتاجىن تىڭداپ-تۇسىنۋگە، سوعان سايكەس دەر كەزىندە ناتيجەلى شارالار قابىلداۋعا جانە دۇرىس شەشىم شىعارۋعا قابىلەتتى بولۋى كەرەك. بۇل - ەڭ باستى تالاپ. ولار «ادام مەملەكەت ءۇشىن ەمەس، مەملەكەت ادام ءۇشىن» دەگەن قاعيداتتى بەرىك ۇستانۋعا ءتيىس»، - دەدى مەملەكەت باسشىسى.
