پرەزيدەنت شەنەۋنىكتەرگە كەم دەگەندە ەكى شەت ءتىلىن ۇيرەنۋدى بۇيىردى

دۋشانبە. KAZINFORM - تاجىكستان پرەزيدەنتى ەمومالي راحمون رەسپۋبليكانىڭ بارلىق وبلىستارىنىڭ سۋديالارىن قىزمەتتەن بوساتۋ جانە تاعايىنداۋ تۋرالى جارلىققا قول قويىپ، جاڭا كادرلارمەن كەزدەسۋ وتكىزدى. بۇل تۋرالى تاجىكستان باسشىسىنىڭ باسپا ءسوز قىزمەتى حابارلادى.

كەزدەسۋدە ەمومالي راحمون كاسىبي بىلىكتىلىكتى ارتتىرۋ، ۇلتتىق زاڭدار مەن حالىقارالىق قۇقىقتىق نورمالاردى مەڭگەرۋ، ءتىل ءبىلۋ سياقتى ماسەلەلەرگە نازار اۋداردى.

بۇل رەتتە ەل پرەزيدەنتى ءاربىر مەملەكەتتىك قىزمەتشى مەملەكەتتىك ءتىلدى جوعارى دەڭگەيدە جانە كەمىندە ەكى شەت ءتىلىن ءبىلۋى كەرەكتىگىن باسا ايتتى.

وسىعان وراي، ادىلەت ورگاندارىنىڭ قىزمەتكەرلەرى مەن بارلىق مەملەكەتتىك قىزمەتشىلەرگە شەت تىلدەرىن تەرەڭدەتىپ وقىتۋعا ءبىر جىل مەرزىم بەرۋ جانە اتالعان تالاپتار ورىندالماعان جاعدايدا ولارعا قاجەتتى شارالار قولدانۋ تاپسىرىلدى.

سونداي-اق، قىلمىستىق ىستەردى ۋاقتىلى قاراۋ، تۇرعىنداردىڭ ارىز-شاعىمدارىنا دۇرىس كوڭىل ءبولۋ، زاڭدىلىق پەن زاڭدىلىقتى قامتاماسىز ەتۋ بويىنشا قاتاڭ تاپسىرمالار بەرىلدى.

- ار-وجداندى جانە ادال، ادەپتى بولىڭدار، ويتكەنى حالىققا شىن نيەتپەن قىزمەت ەتۋ ارقىلى عانا ابىروي مەن قۇرمەتكە يە بولا الاسىز، - دەدى تاجىكستان پرەزيدەنتى.