پرەزيدەنت شەكارا ماڭىنان مارقاكول مەن كاتونقاراعاي اتتى ەكى جاڭا اۋدان قۇرۋ ماسەلەسىن قوزعادى

پرەزيدەنت شىعىس قازاقستان وبلىسىنىڭ اكىمى ەرمەك كوشەربايەۆتى قابىلدادى، دەپ حابارلايدى Kazinform اقورداعا سىلتەمە جاساپ.

مەملەكەت باسشىسىنا وبلىستىڭ بيىلعى 11 ايداعى الەۋمەتتىك-ەكونوميكالىق دامۋ ناتيجەسى تۋرالى مالىمەت بەرىلدى.

پرەزيدەنتكە بەرىلگەن اقپاراتقا سايكەس، وسى جىلدىڭ قورىتىندىسى بويىنشا شىعىس قازاقستان وبلىسىنىڭ جالپى وڭىرلىك ءونىمى 4,4 تريلليون تەڭگە بولادى دەگەن بولجام جاسالىپ وتىر.

قازىرگى تاڭدا ينۆەستيتسيالىق جوبالاردىڭ جالپىۇلتتىق قۇرامىنا ايماقتان قۇنى 1,1 تريلليون تەڭگە بولاتىن 42 جوبا كىرگەن.

بيىل سوماسى 77 ميلليارد تەڭگەنى قۇرايتىن 8 جوبا جۇزەگە اسىرىلىپ جاتىر.

ءوڭىردىڭ اگروونەركاسىپ كەشەنىندە 37 ءىرى جوبا ورىندالادى. ولارعا سالىناتىن ينۆەستيتسيا - 236,4 ميلليارد تەڭگە.

قازاقستاندا العاش رەت جىلىنا 4 مىڭ توننا سۇيىق لەتسيتين ءوندىرۋ ءۇشىن كۇنباعىس تۇقىمىن تەرەڭ وڭدەۋ ءادىسى ەنگىزىلىپ جاتىر.

شاعىن جانە ورتا بيزنەستى دامىتۋعا قولايلى جاعداي جاسالۋدا. اتاپ ايتقاندا، وسى باعىتتاعى جوبالارعا 22 ميلليارد تەڭگە كولەمىندە قولداۋ كورسەتىلگەن.

سونىمەن قاتار پرەزيدەنتكە 2024-جىل وبلىستا جول جىلى دەپ جاريالانعانى تۋرالى ايتىلدى.

جول جوندەۋگە جانە سالۋعا بولىنەتىن قارجىنى ەكى ەسە ۇلعايتۋ جوسپارلانىپ وتىر. جالپى 600 شاقىرىم جولدى جانە كوشەلەردى جوندەۋ جوسپارلانعان.

پرەزيدەنتتىڭ تاپسىرماسىن ورىنداۋ ماقساتىندا ريددەر جىلۋ ەلەكتر ورتالىعىندا قالپىنا كەلتىرۋ جۇمىستارى جۇرگىزىلدى. 6 قازاندىق اگرەگاتى جوندەلدى. بۇگىندە ريددەر تۇرعىندارى جىلۋمەن قامتاماسىز ەتىلگەن.

بۇدان بولەك، كەزدەسۋدە شەكارا ماڭىنان مارقاكول جانە كاتونقاراعاي اتتى ەكى جاڭا اۋدان قۇرۋ ماسەلەسىنە ەرەكشە نازار اۋدارىلدى.

كەزدەسۋ قورىتىندىسى بويىنشا قاسىم-جومارت توقايەۆ ءوڭىر حالقىنىڭ ءومىر ءسۇرۋ ساپاسىن ارتتىرۋ ماڭىزدى ەكەنىن اتاپ ءوتىپ، شىعىس قازاقستان وبلىسىن الەۋمەتتىك-ەكونوميكالىق تۇرعىدا ودان ءارى دامىتۋعا قاتىستى ءبىرقاتار مىندەت جۇكتەدى.