پرەزيدەنت ءىس باسقارماسى مەن دۇنيەجۇزىلىك تۋريستىك ۇيىم ىنتىماقتاستىق تۋرالى مەموراندۋمعا قول قويدى

استانا. KAZINFORM - استانادا قازاقستاندىق تۋريزمدى دامىتۋ جانە حالىقارالىق تاجىريبەمەن الماسىپ، ىنتىماقتاستىقتى ىلگەرىلەتۋ ماسەلەلەرىنە ارنالعان دوڭگەلەك ۇستەل ءوتتى.

ءىس-شارانىڭ ماقساتى - قازاقستان رەسپۋبليكاسىندا تۋريزمدى دامىتۋ بويىنشا مەملەكەت باسشىسىنىڭ العا قويعان مىندەتتەرىن ورىنداۋ.

پرەزيدەنت ءىس باسقارماسى ۇيىمداستىرعان دوڭگەلەك ۇستەل وتىرىسىنا بۇۇ جانىنداعى دۇنيەجۇزىلىك تۋريستىك ۇيىمنىڭ (UNWTO) باس حاتشىسى زۋراب پولوليكاشۆيلي قاتىستى.

«مەن ءۇشىن قازاقستاندا، ءوزىنىڭ تابيعي سۇلۋلىعىمەن، مادەني ارتۇرلىلىگىمەن جانە تۋريزمدى دامىتۋ ءۇشىن شەكسىز الەۋەتىمەن تاڭ قالدىرۋدى توقتاتپايتىن جەردە بولۋ ۇلكەن مارتەبە. قازاقستاننىڭ وسى سالاداعى الەۋەتى زور ەكەنىنە سەنىمدىمىن. ەلدەرىڭىزدە بىرەگەي تابيعي رەسۋرستارى بار. شەكسىز دالا مەن تاۋلاردان باستاپ كولدەر مەن ەجەلگى قالالارعا دەيىن، ولار الەمنىڭ تۇكپىر-تۇكپىرىنەن كەلگەن تۋريستەردى قىزىقتىرادى. الايدا، تابيعي الەۋەت قانا ەمەس، مادەني الەۋەت تە ماڭىزدى. قازاقستان - وركەنيەتتەردىڭ، شىعىس پەن باتىس توعىسقان جەر. سوڭعى جىلدارى ءبىز قازاقستاندا تۋريستىك ينفراقۇرىلىمنىڭ بەلسەندى دامۋىن بايقاپ وتىرمىز، بۇل سىزدەردىڭ ەلدەرىڭىزدىڭ ايماقتاعى جەتەكشى تۋريستىك باعىتتاردىڭ ءبىرى بولۋ نيەتىنىڭ ماڭىزدىلىعىن راستايدى. ب ۇ ۇ- نىڭ دۇنيەجۇزىلىك تۋريستىك ۇيىمى ءتۋريزمدى دامىتۋ باعىتىنداعى جوسپاردى جۇزەگە اسىرۋدا قولداۋ كورسەتۋگە دايىن. ءبىز حالىقارالىق تۋريستەر تاراپىنان قازاقستانعا ۇلكەن قىزىعۋشىلىق تانىتىپ وتىرمىز. ءبىزدىڭ مىندەت - قازاقستاندىق تۋريزم الەۋەتىن ىسكە اسىرۋعا كومەكتەسۋ»، - دەدى زۋراب پولوليكاشۆيلي جيىن بارىسىندا.

سونداي-اق ءىس-شارانىڭ قورىتىندىسى بويىنشا پرەزيدەنت ءىس باسقارماسى مەن دۇنيەجۇزىلىك تۋريستىك ۇيىم ىنتىماقتاستىق تۋرالى مەموراندۋمعا قول قويىلدى.

«ءبىزدىڭ الدىمىزداعى ماڭىزدى مىندەت - وتاندىق تۋريزمدى ءتيىمدى دامىتۋ جانە حالىقارالىق ارەناداعى وزگەرمەلى جاعدايلارعا بەيىمدەلۋ. بىزدە تابىسقا جەتۋ ءۇشىن بارلىق قاجەتتى رەسۋرستار مەن مۇمكىندىكتەر بار. قازاقستاننىڭ الەمدىك تۋريزم سالاسى قاتارىنا ەنۋدە شەشۋشى ءرول اتقاراتىن دۇنيەجۇزىلىك تۋريستىك ۇيىممەن ىنتىماقتاستىعىمىز ماڭىزدى»، - دەدى ق ر پرەزيدەنتى ءىس باسقارۋشىسىنىڭ ورىنباسارى رۋستام باياليەۆ.

ودان بولەك، رۋستام باياليەۆ «بۋراباي» كۋرورتى اۋماعىندا تۋريستىك-ينفراقۇرىلىمدىق جوبالاردى ىسكە اسىرۋ قاجەتتىگىن ايتتى.

ايتا كەتەيىك، «بۋراباي» كۋرورتى سوڭعى جىلدارى قازاقستاندىقتار مەن شەتەلدىك تۋريستەر اراسىندا ۇلكەن سۇرانىسقا يە. كەلۋشىلەردىڭ سانى ميلليوننان اسادى.