پرەزيدەنت ءبىرقاتار مەملەكەتتىڭ ەلشىلەرىنەن سەنىم گراموتالارىن قابىلدادى
«اقوردا» رەزيدەنتسياسىندا ون ءتورت مەملەكەتتىڭ توتەنشە جانە وكىلەتتى ەلشىلەرىنىڭ پرەزيدەنت قاسىم-جومارت توقايەۆقا سەنىم گراموتالارىن تاپسىرۋ ءراسىمى ءوتتى، دەپ حابارلايدى قازاقپارات.

مەملەكەت باسشىسى ديپلوماتتارعا ەلىمىز ب ۇ ۇ جارعىسىنىڭ ماقساتتارى مەن قاعيداتتارىنا نەگىزدەلگەن ادىلەتتى الەم ورناتۋ ءتارتىبىن جاقتايتىنىن ايتتى.
- قازاقستان ەلدىڭ قاۋىپسىزدىگى مەن ورنىقتى دامۋىن قامتاماسىز ەتۋگە باعىتتالعان بەيبىت سىرتقى ساياسات جۇرگىزەدى. ءبىز سىزدەردىڭ مەملەكەتتەرىڭىزبەن ءوزارا ءتيىمدى، دوستىق قارىم-قاتىناستاردى كەڭەيتۋگە جانە نىعايتۋعا مۇددەلىمىز، - دەدى پرەزيدەنت.
قاسىم-جومارت توقايەۆ قازاقستاننىڭ ەكونوميكالىق دامۋ تۇرعىسىنان كەلەشەگى زور ەكەنىن، ەلىمىزدى الەمدىك ەكونوميكانىڭ ماڭىزدى بولىگىنە اينالدىرۋ ءۇشىن بارلىق مۇمكىندىكتى جاسايتىنىن اتاپ ءوتتى.
- ەلىمىز - ورتالىق ازيا وڭىرىندەگى ەكونوميكاسى ەڭ دامىعان مەملەكەت. ءبىراق ءبىز مۇنىمەن توقتاپ قالمايمىز. ەكونوميكامىزدى ودان ءارى ورنىقتى دامىتۋ ءۇشىن بار كۇش-جىگەرىمىزدى جۇمسايمىز، - دەدى مەملەكەت باسشىسى.
پرەزيدەنت سالتاناتتى ءراسىم سوڭىندا ەلشىلەردى قازاقستانداعى ديپلوماتيالىق ميسسياسىنىڭ رەسمي تۇردە باستالۋىمەن قۇتتىقتاپ، ەكىجاقتى ىنتىماقتاستىقتى ودان ءارى نىعايتۋ ىسىندە تابىس تىلەدى. قاسىم-جومارت توقايەۆ سەنىم گراموتالارىن تاپسىرعان ەلشىلەر مەملەكەتتەرىنىڭ باسشىلارىنا ىزگى تىلەگى مەن سالەمىن جولدادى.