پرەزيدەنت ءال- فارابي اتىنداعى قازاق ۇلتتىق ۋنيۆەرسيتەتىن 90 جىلدىق مەرەيتويىمەن قۇتتىقتادى

الماتى. KAZINFORM - بۇگىن ءال- فارابي اتىنداعى قازۇۋ 90 جىلدىق مەرەيتويىن اتاپ ءوتىپ جاتىر. مەملەكەتتىك كەڭەسشى ەرلان قارين قازاقستان پرەزيدەنتىنىڭ اتىنان ءبىلىم ورداسىن مەرەيتويىمەن قۇتتىقتادى

ءىس- شاراعا ىرگەلى ءبىلىم ورداسىنىڭ پروفەسسورلىق- وقىتۋشىلىق قۇرامى، ستۋدەنتتەرى، تۇلەكتەرى جانە ۋنيۆەرسيتەتپەن سەرىكتەستىك ورناتقان شەتەلدىڭ جوعارى وقۋ ورىندارىنىڭ وكىلدەرى قاتىستى.

ەرلان قارين جيىندا قازاقستان پرەزيدەنتى قاسىم- جومارت توقايەۆتىڭ قۇتتىقتاۋ حاتىن وقىپ بەردى. حاتتا مەملەكەت باسشىسى ۋنيۆەرسيتەتتىڭ مەرەيلى بەلەسى ۇلتتىق عىلىم جانە تۇتاس ءبىلىم بەرۋ جۇيەسى ءۇشىن ايتۋلى وقيعا ەكەنىن اتاپ وتكەن.

- قادىرلى قاۋىم، بارشاڭىزدى ءال- فارابي اتىنداعى قازاق ۇلتتىق ۋنيۆەرسيتەتىنىڭ قۇرىلعانىنا 90 جىل تولۋىمەن قۇتتىقتايمىن. بۇل تۇتاس ءبىلىم جانە عىلىم سالاسىنىڭ مەرەيلى مەرەكەسى. قازۇۋ ەلىمىزدىڭ تۇڭعىش جوعارى وقۋ ورىندارىنىڭ ءبىرى. قاسيەتتى قارا شاڭىراق عاسىرعا جۋىق ۋاقىت ىشىندە ىرگەلى ءبىلىم ورداسىنا اينالدى. بىلىكتى ماماندار ۇستاحاناسى رەتىندە ءوزىنىڭ بىرەگەي ءداستۇرىن قالىپتاستىردى، - دەلىنگەن مەملەكەت باسشىسىنىڭ قۇتتىقتاۋىندا.

قازۇۋ - ەلىمىزدەگى العاشقى ۋنيۆەرسيتەتتەردىڭ ءبىرى. قازىرگى تاڭدا ءبىلىم ورداسى حالىقارالىق رەيتينگتەرگە سايكەس ورتالىق ازيا ەلدەرىنىڭ جوعارى وقۋ ورىندارى اراسىندا كوش باستاپ تۇر، ال ونىڭ تۇلەكتەرى ەلىمىزدىڭ وركەندەۋىنە ەلەۋلى ۇلەس قوسىپ كەلەدى.

- قازىرگى جاستاردى وسى ساباقتاستىقتى ساقتاپ، اعا بۋىننىڭ جولىن لايىقتى جالعاستىرىپ كەلەدى. ءبىلىم ورداسى بۇگىنگى مەرەيتويىنا زور جەتىستىكتەرمەن جەتىپ وتىر. بەدەلدى حالىقارالىق رەيتينگتەردە ورتالىق اشيا ايماعىنداعى جوعارعى وقۋ ورىندارىنىڭ كوشىن باستاۋى سونىڭ ايقىن دالەلى. وسكەلەڭ ۇرپاقتى ءبىلىم، عىلىمعا باۋلىپ، ولاردىڭ بويىنا ادال ازاماتقا ءتان قاسيەتتەردى ءسىڭىرۋ جولىندا ەڭبەك ەتىپ جۇرگەن ۋنيۆەرسيتەت ۇجىمىنا شىنايى ريزاشىلىعىمدى بىلدىرەمىن. سىزدەر الداعى ۋاقىتتا دا وسى ميسسيانى ابىرويمەن اتقاراسىزدار دەپ سەنەمىن، - دەلىنگەن پرەزيدەنت قۇتتىقتاۋىندا.

سونىمەن قاتار مەملەكەتتىك كەڭەسشى ۋنيۆەرسيتەت ۇجىمىن، ستۋدەنتتەرىن جانە تۇلەكتەرىن مەرەيتويمەن قۇتتىقتادى. ول ءال- فارابي اتىنداعى قازاق ۇلتتىق ۋنيۆەرسيتەتىنىڭ ايرىقشا ءرولىن اتاپ ءوتىپ، وقۋ ورنى الماتىنىڭ جانە وتاندىق ءبىلىم بەرۋ سالاسىنىڭ بەلگىلى برەندتەرىنىڭ بىرىنە اينالعانىن جەتكىزدى.

ءبىلىم ورداسىنىڭ رەكتورى جانسەيىت تۇيمەبايەۆ ءوز كەزەگىندە وقۋ ورنىنىڭ عىلىمي- زەرتتەۋ باعىتىنداعى، يننوۆاتسيا سالاسىنداعى جەتىستىكتەرى، ستۋدەنتتەر قالاشىعىنىڭ دامۋى، ۋنيۆەرسيتەتتىڭ الداعى جوسپارى تۋرالى باياندادى.

سالتاناتتى ءىس- شارادا ۋنيۆەرسيتەت قىزمەتكەرلەرى مەملەكەتتىك ناگرادالارمەن ماراپاتتالدى. جاس عالىمدارعا پاتەر كىلتى تابىستالدى. سونداي- اق ءبىلىم ورداسىنىڭ تاريحى مەن جەتىستىكتەرى تۋرالى دەرەكتى فيلم كورسەتىلدى. جيىن شىعارماشىلىق ۇجىمدارى، قازاق ەستراداسى مەن وپەراسىنىڭ ايگىلى ورىنداۋشىلارىنىڭ قاتىسۋىمەن وتكەن مەرەكەلىك كونتسەرتكە ۇلاستى.

ايتا كەتەيىك، بۇعان دەيىن ساپاسىز ءبىلىم بەرەتىن ج و و- لاردى قىسقارتۋ جالعاساتىنى حابارلانعان.