پرەزيدەنت ۇ ع ا دامىتۋ ستراتەگياسى مەن جۇمىس جوسپارىن پىسىقتاۋدى تاپسىردى
استانا. KAZINFORM - مەملەكەت باسشىسى ۇلتتىق عىلىم اكادەمياسىنىڭ پرەزيدەنتى اقىلبەك كۇرىشبايەۆتى قابىلدادى. كەزدەسۋ بارىسىندا وتاندىق عىلىمدى دامىتۋ ماسەلەلەرى تالقىلاندى - دەپ حابارلايدى اقوردا.
مەملەكەت باسشىسى بىلتىر جاڭا مارتەبە بەرىلگەن ۇلتتىق عىلىم اكادەمياسى وتاندىق عالىمداردىڭ كۇش-جىگەرىن بىرىكتىرىپ، عىلىم مەن ەكونوميكاعا ناقتى پايدا اكەلەتىن جاڭالىقتار ەنگىزۋگە ەرەكشە ءمان بەرۋگە ءتيىس ەكەنىن اتاپ ءوتتى.
«قاسىم-جومارت توقايەۆ ۇلتتىق عىلىم اكادەمياسىنىڭ جاڭا مۇشەلەرىن سايلاۋ پروتسەسىن جەدەلدەتۋ، اكادەميا جۇمىسىنا تالانتتى جاس عالىمدار مەن جاڭا مامانداردى كەڭىنەن تارتۋ قاجەت ەكەنىنە نازار اۋداردى»، - دەلىنگەن حابارلامادا.
سونىمەن قاتار پرەزيدەنتكە اقىلبەك كۇرىشبايەۆ ءوزى باسقاراتىن قازاق ۇلتتىق اگرارلىق زەرتتەۋ ۋنيۆەرسيتەتىنىڭ عىلىمي زەرتتەۋلەرىن جانە اگروونەركاسىپ سالاسىن جەتىلدىرۋگە باعىتتالعان جۇمىستارىن تانىستىردى.
مەملەكەت باسشىسىنىڭ پىكىرىنشە، وقۋ ورنىنا زەرتتەۋ ۋنيۆەرسيتەتى مارتەبەسىنىڭ بەرىلۋى اگرارلىق سەكتورداعى عىلىمي ازىرلەمەلەردى ناقتى وندىرىسكە ەنگىزۋگە، عىلىمي زەرتتەۋلەردىڭ ناتيجەسىن كوممەرتسيالاندىرۋعا مۇمكىندىك بەرەدى.
«كەزدەسۋ سوڭىندا قاسىم-جومارت توقايەۆ جاڭا مىندەتتەردى ەسكەرە وتىرىپ، ۇلتتىق عىلىم اكادەمياسىن دامىتۋ ستراتەگياسى مەن جۇمىس جوسپارىن پىسىقتاۋدى تاپسىردى. سونىمەن قاتار قازاقستان عىلىم اكادەمياسىنىڭ نەگىزىن قالاعان قانىش ساتبايەۆتىڭ 125 جىلدىعىنا ارنالعان ءىس-شارالاردى جوعارى دەڭگەيدە ۇيىمداستىرۋ ماڭىزدى ەكەنىن ايتتى»، - دەپ جازىلعان.
