پرەزيدەنت «بولاشاق» حالىقارالىق ستيپەندياسىنىڭ 30 جىلدىعىمەن قۇتتىقتادى
پرەزيدەنت قاسىم-جومارت توقايەۆ «بولاشاق» حالىقارالىق ستيپەندياسىنىڭ 30 جىلدىعىنا ارنالعان سالتاناتتى فورۋم قاتىسۋشىلارىنا قۇتتىقتاۋ حاتىن جولدادى، دەپ حابارلايدى Kazinform اقوردانىڭ باسپا ءسوز قىزمەتىنە سىلتمە جاساپ.
قۇرمەتتى فورۋمعا قاتىسۋشىلار!
بارشاڭىزدى «بولاشاق» حالىقارالىق ستيپەندياسىنىڭ بەلگىلەنگەنىنە 30 جىل تولۋىمەن قۇتتىقتايمىن!
بۇل - قازاقستاننىڭ ءار تۇكپىرىندەگى دارىندى جاستارعا جول اشقان تەڭدەسسىز باعدارلامانىڭ مەرەيلى بەلەسى. وسى بىرەگەي جوبا مەملەكەتىمىزدە وزىق ويلى ءارى بىلىكتى كادرلار رەزەرۆىن قالىپتاستىرۋعا زور سەپتىگىن تيگىزدى.
«بولاشاق» باعدارلاماسىنىڭ مىڭداعان تۇلەگى بۇگىندە ءتۇرلى سالاداعى وڭ وزگەرىستىڭ جارشىسى بولىپ، ەلىمىزدىڭ يگىلىگى ءۇشىن تابىستى ەڭبەك ەتىپ ءجۇر.
قازىر قازاقستاندى وركەندەتە ءتۇسۋ ءۇشىن تىڭ سەرپىلىس قاجەت. ءبىزدىڭ الدىمىزدا ەل ەكونوميكاسىنىڭ قۇرىلىمىن قايتا ءتۇزۋ، ساياسي جۇيەنى ودان ءارى جاڭعىرتۋ جانە شىن مانىندە ادىلەتتى ءارى ينكليۋزيۆتى قوعام قالىپتاستىرۋ سياقتى اۋقىمدى مىندەتتەر تۇر. وسى ورايدا ءبىلىم بەرۋ سالاسىنا ينۆەستيتسيا سالۋ جانە ازاماتتاردىڭ ءوز الەۋەتىن تولىق پايدالانۋىنا مۇمكىندىك جاساۋ وتە ماڭىزدى.
مەملەكەت ادال ازاماتقا ءتان قاسيەتتەردى بويىنا سىڭىرگەن دارىندى، ەڭبەكقور، تالاپتى جاستاردى ءاردايىم قولدايدى.
«بولاشاق» باعدارلاماسىنىڭ تۇلەكتەرى عانا ەمەس، ەلىمىزدەگى بارلىق جاس ماماندار قازاقستاندى جان- جاقتى جاڭعىرتۋ جولىنداعى كەلەلى ىسكە ءوز ۇلەسىن قوسادى دەپ سەنەمىن.
بارشاڭىزعا باق-بەرەكە، تولاعاي تابىس تىلەيمىن!
