پرەزيدەنت بەلگىلى عالىم، ابايتانۋشى مەكەمتاس مىرزاحمەت ۇلىنىڭ وتباسىنا كوڭىل ايتتى
استانا. KAZINFORM - پرەزيدەنت بەلگىلى عالىم، ابايتانۋشى مەكەمتاس مىرزاحمەت ۇلىنىڭ وتباسى مەن جاقىن تۋىستارىنا كوڭىل ايتۋ جەدەلحاتىن جولدادى، دەپ حابارلايدى اقوردانىڭ باسپا ءسوز قىزمەتى.
قاسىم-جومارت توقايەۆ كورنەكتى ابايتانۋشى عالىم، فيلولوگيا عىلىمدارىنىڭ دوكتورى، ءى دارەجەلى «بارىس» وردەنىنىڭ يەگەرى مەكەمتاس مىرزاحمەت ۇلىنىڭ دۇنيەدەن وتۋىنە بايلانىستى ونىڭ وتباسى مەن جاقىن تۋىستارىنا كوڭىل ايتتى.
- مەكەمتاس مىرزاحمەت ۇلى بار ساليقالى عۇمىرىن اباي مۇراسىن زەردەلەۋگە، وتاندىق ادەبيەتتانۋ عىلىمىنىڭ كەرەگەسىن كەڭەيتۋگە ارناعان زيالى تۇلعا ەدى. ۇلت رۋحانياتىنىڭ ىلگەرى باسۋىنا سۇبەلى ۇلەس قوسىپ، كوپتەگەن شاكىرت تاربيەلەدى. ۇزاق جىلعى قاجىرلى ىزدەنىستەرىنەن تۋعان قۇندى ەڭبەكتەرى لايىقتى باعاعا يە بولدى. عيبراتتى عۇمىر كەشىپ، سوڭىنا ونەگەلى ءىز قالدىرعان مەكەمتاس مىرزاحمەت ۇلىنىڭ اياۋلى ەسىمى حالقىمىزدىڭ جادىندا ساقتالادى. مارقۇمنىڭ يمانى سالامات، جانى ءجانناتتا بولسىن، - دەپ جازىلعان جەدەلحاتتا.
وسىعان دەيىن بەلگىلى ابايتانۋشى، ادەبيەتتانۋشى عالىم، فيلولوگيا عىلىمدارىنىڭ دوكتورى، پروفەسسور، ق ر مەملەكەتتىك سىيلىعىنىڭ جانە «تۇركى الەمىنە قىزمەت» حالىقارالىق سىيلىعىنىڭ يەگەرى مەكەمتاس مىرزاحمەت ۇلى ومىردەن وتكەنىن جازعان ەدىك.
