پرەزيدەنت ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆانى قابىلدادى
استانا. KAZINFORM - قاسىم-جومارت توقايەۆقا ەلىمىزدەگى الەۋمەت جانە ەڭبەك سالالارىن دامىتۋ بويىنشا اتقارىلىپ جاتقان جۇمىستاردىڭ ەسەبى مەن الداعى جوسپارى جونىندە اقپارات بەرىلدى.
مەملەكەت باسشىسىنا اتاۋلى الەۋمەتتىك كومەك كورسەتۋدىڭ جاڭا تاسىلدەرى ۇسىنىلدى. بۇل شارالار الەۋمەتتىك قولداۋدىڭ تيىمدىلىگىن ارتتىرىپ، كومەكتىڭ ءتيىستى ازاماتتارعا ءدال جەتۋىن كوزدەيدى.
سۆەتلانا جاقىپوۆانىڭ ايتۋىنشا، 2025-جىلدىڭ 1-قاڭتارىنان باستاپ ارناۋلى الەۋمەتتىك قىزمەت كورسەتۋ ورتالىقتارىندا جان باسىنا شاققانداعى قارجىلاندىرۋدى ليتسەنزيالاۋ جۇيەسى ەنگىزىلەدى. بۇل ماقساتتا كاسىبي ستاندارتتار مەن وقىتۋ مودۋلدەرى ازىرلەنگەن. 2030-جىلعا دەيىنگى ينكليۋزيۆتى ساياسات تۇجىرىمداماسى اياسىندا مۇگەدەكتىكتىڭ الەۋمەتتىك-قۇقىقتىق قورعاۋ مودەلىنە كوشۋ ەنگىزىلىپ جاتىر.
پرەزيدەنتكە حالىقتى جۇمىسپەن قامتۋعا باعىتتالعان شارالار جونىندە باياندالدى. ءمينيستردىڭ ايتۋىنشا، بيىل 804 مىڭنان استام ادام جۇمىسقا ورنالاستى. ولاردىڭ ىشىندە 200 مىڭنان استامى جاستار. ال 9 مىڭعا جۋىق ازامات، سونىڭ ىشىندە مۇمكىندىگى شەكتەۋلى ازاماتتار مەن ەرەكشە قاجەتتىلىكتەرى بار بالالاردىڭ اتا- انالارى بيزنەس يدەيالارىن جۇزەگە اسىرۋ ءۇشىن گرانت الدى.
قاسىم-جومارت توقايەۆقا ساپالى جوسپارلاۋ مەن مەملەكەتتىك ينۆەستيتسيالاردىڭ تيىمدىلىگىن ارتتىرۋ ماقساتىندا ازىرلەنگەن «جوبالاردىڭ يننوۆاتسيالىق ناۆيگاتورى» قاناتقاقتى جوباسى تۋرالى باياندالدى. اتالعان جۇيە ماماندارعا دەگەن سۇرانىستى تالداپ، بولجايدى، سونداي-اق جوبالاردىڭ تيىمدىلىگىنە مونيتورينگ جاساپ، ساپاسىن قاداعالايدى جانە ۇيلەستىرۋدى قامتاماسىز ەتەدى. پلاتفورما قازىردىڭ وزىندە جالپى قۇنى 33 تريلليون تەڭگە بولاتىن 755 ينۆەستيتسيالىق جوبانى سۇيەمەلدەپ وتىر. ونى جۇزەگە اسىرۋ اياسىندا 150 مىڭعا دەيىن جۇمىس ورنىن قۇرۋ جوسپارلانعان. ناۆيگاتور قاجەتتى ەڭبەك رەسۋرستارى جوق جاۋاپسىز مەردىگەرلەردى انىقتاۋعا دا مۇمكىندىك بەرەدى.
مينيستر ەڭبەك جانجالدارىنىڭ الدىن الۋعا كومەكتەسەتىن ەڭبەك تاۋەكەلدەرىنىڭ سيفرلىق كارتاسىنىڭ جۇمىسىنا توقتالدى.
قاسىم-جومارت توقايەۆ الەۋمەتتىك ساياساتتى جەتىلدىرۋ جانە الەۋمەت جانە ەڭبەك سالالارىنداعى شارالاردىڭ تيىمدىلىگىن ارتتىرۋ جونىندە ءبىرقاتار تاپسىرما بەردى.
