پرەزيدەنت BI Group حولدينگىنىڭ ەنشىلەس كاسىپورنىن ارالادى
MODEX Astana تەمىربەتون كونسترۋكتسيالارىن شىعاراتىن زاۋىتى 2020-جىلدان بەرى جۇمىس ىستەپ تۇر جانە وندا 360 ادام ەڭبەك ەتەدى. جوبانىڭ قۇنى - 16 ميلليارد تەڭگە، دەپ حابارلايدى Kazinform.
كاسىپورىندا يندۋستريالىق-مودۋلدىك قۇرىلىستىڭ يننوۆاتسيالىق تەحنولوگيالارى قولدانىلادى.
BI Group كومپانياسى ديرەكتورلار كەڭەسىنىڭ ءتوراعاسى ايدىن راحىمبايەۆتىڭ ايتۋىنشا، مودۋلدىك ءۇيدىڭ قۇرىلىسى ءارتۇرلى عيمارات سالۋ ۋاقىتىن ەداۋىر قىسقارتۋعا، ولاردىڭ وزىندىك قۇنىن تومەندەتۋگە مۇمكىندىك بەرەدى.
بۇل حالىقتىڭ باسىم بولىگى ءۇشىن تۇرعىن ءۇيدىڭ قولجەتىمدى بولۋىنا ىقپال ەتەدى.
اتالعان تەحنولوگيانى ۇيلەردىڭ، كوتتەدجدەر مەن تۇرعىن ءۇي كەشەندەرىنىڭ قۇرىلىسى كەزىندە عانا ەمەس، سونداي-اق الەۋمەتتىك ينفراقۇرىلىم نىساندارىن سالۋ بارىسىندا دا قولدانۋعا بولادى.
كومپانيا قۇرىلعان كۇننەن باستاپ وسى تەحنولوگيا بويىنشا جالپى اۋدانى 200 مىڭ شارشى مەتردەن استام نىساندار سالدى.
