پرەزيدەنت بالالاردىڭ حاتتارىنا جاۋاپ بەردى
ءداستۇر بويىنشا جاڭا جىل قارساڭىندا ەلىمىزدىڭ بارلىق ايماعىندا «تىلەكتەر شىرشاسى» ورناتىلادى. سول جەرگە بالالار ءوز تىلەكتەرىن جازىپ قالدىرادى، دەپ حابارلايدى Kazinform اقورداعا سىلتەمە جاساپ.
بيىل اتالعان جوبا اياسىندا مەملەكەت باسشىسىنىڭ اتىنا قازاقستاننىڭ تۇكپىر- تۇكپىرىنەن كوپتەگەن حات كەلىپ ءتۇستى، سونىڭ ىشىندە كوپبالالى وتباسىنان شىققان، اتا-انا قامقورلىعىنسىز قالعان، مۇمكىندىگى شەكتەۋلى جانە جەتىم بالالاردان 100 دەن استام تىلەك جولداندى.
بۇلدىرشىندەر ءوز حاتىندا ۆەلوسيپەد، دومبىرا، كومپيۋتەر، جازعى لاگەرگە جولداما جانە باسقا دا زاتتاردى سىيلىققا الۋدى، ءتىپتى استاناعا كەلىپ، «اقوردا» رەزيدەنتسياسىن ارالاپ كورۋدى سۇراعان.
بالالاردىڭ حاتتارىنا جاۋاپ بەرگەن پرەزيدەنت ولاردى جاڭا جىلمەن قۇتتىقتادى.
سونداي- اق بۇل ەرتەگىدەي ەرەكشە مەرەكە ەكەنىن اتاپ ءوتىپ، بۇلدىرشىندەرگە ءوز اتىنان ارنايى سىيلىقتار جىبەردى.
مەملەكەت باسشىسى بالالاردى بىلىمگە قۇشتار بولۋعا، كىتاپ وقۋعا، سپورتپەن شۇعىلدانۋعا، تابيعاتتى ايالاۋعا جانە جاقسىلىق جاساۋعا شاقىردى.
