پرەزيدەنت باشقۇرتستان رەسپۋبليكاسىنىڭ باسشىسى رادي حابيروۆتى قابىلدادى

Akorda
Photo: Akorda

استانا. KAZINFORM - قاسىم-جومارت توقايەۆ استانا مەن ماسكەۋدىڭ ەكىجاقتى بايلانىستارىن نىعايتۋعا ءوڭىرارالىق ىقپالداستىق ەلەۋلى ۇلەس قوسىپ وتىرعانىن اتاپ ءوتتى. وسى ورايدا باشقۇرتستان رەسپۋبليكاسى ەرەكشە ءرول اتقارادى.

- قازاقستان مەن رەسەي اراسىنداعى جان-جاقتى قاتىناستارعا تىڭ سەرپىن بەرۋ تۇرعىسىنان العاندا بۇگىنگى ساپارىڭىزدىڭ ءمانى زور. ءبىز يندۋستريا، اگروونەركاسىپ كەشەنى جانە گۋمانيتارلىق سالالارداعى بايلانىستارىمىزدى ءارتاراپتاندىرۋ ءۇشىن بارىنشا كۇش سالامىز، - دەدى مەملەكەت باسشىسى.

پرەزيدەنت ءبىرقاتار كەلىسىمنىڭ، سونىڭ ىشىندە ۇكىمەتتەر دەڭگەيىندە قول قويىلعان ىنتىماقتاستىقتىڭ 2023-2024-جىلدارعا ارنالعان جول كارتاسىنىڭ تابىستى جۇزەگە اسىرىلىپ جاتقانىنا نازار اۋداردى. مەملەكەت باسشىسى ەلىمىزدىڭ وڭىرلەرى مەن باشقۇرتستان اراسىنداعى تاۋار اينالىمىنىڭ قارقىنىن وڭ باعالادى. بىلتىرعى 11 ايدىڭ قورىتىندىسى بويىنشا ساۋدا-ساتتىق دەڭگەيىنىڭ كورسەتكىشى 350 ميلليون دوللاردان استى. بۇل رەتتە قازاقستان باشقۇرتستان رەسپۋبليكاسىنىڭ جەتەكشى ساۋدا سەرىكتەستەرىنىڭ ۇشتىگىنە كىرەدى.

ءوز كەزەگىندە رادي حابيروۆ قازاق جەرىندە قوناقجايلىق كورسەتكەنى ءۇشىن قاسىم-جومارت توقايەۆقا العىس ايتتى.

- باشقۇرتستان مەن قازاقستان اراسىنداعى قارىم-قاتىناستى دامىتۋعا ەرەكشە ءمان بەرەتىنىڭىزدى بىلەمىز. مەنىمەن بىرگە ۇلكەن دەلەگاتسيا كەلدى. 2-3 جىلدىڭ ىشىندە ءبىز تاۋار اينالىمى مەن ونەركاسىپ كووپەراتسياسىنىڭ كولەمىن ايتارلىقتاي ۇلعايتتىق. بۇگىن «قازاقستان - باشقۇرتستان» فورۋمىن اشتىق. ءبىز ءۇشىن قازاقستان - ەڭ باستى سەرىكتەس. ءبىز مۇندا ءوزىمىزدى ەركىن سەزىنەمىز، - دەدى رادي حابيروۆ.

كەزدەسۋدە ساۋدا-ەكونوميكالىق، مادەني-گۋمانيتارلىق، ونەركاسىپ جانە ءوزارا مۇددەنى كوزدەيتىن باسقا دا سالالارداعى ىنتىماقتاستىقتى جانداندىرۋعا باسا ءمان بەرىلدى.

سوڭعى جاڭالىقتار