پرەزيدەنت ازەربايجان ميللي ءماجىلىسىنىڭ ءتوراعاسى ساگيبا گافاروۆامەن كەلىسسوز جۇرگىزدى

باكۋ. KAZINFORM - قاسىم-جومارت توقايەۆ ساگيبا گافاروۆاعا ءىلتيپات ءبىلدىرىپ، قازاقستان مەن ازەربايجاننىڭ قارىم-قاتىناسى قارقىندى دامىپ كەلە جاتقانىن اتاپ ءوتتى.

- شىن مانىندە، قازاقستان مەن ازەربايجان - ستراتەگيالىق سەرىكتەس ءارى وداقتاس ەلدەر. بۇگىن ءبىز بۇل مارتەبەنىڭ مەملەكەتتەر مەن ۇكىمەتتەر باسشىلارىنا ەرەكشە جاۋاپكەرشىلىك جۇكتەيتىنىن اتاپ وتتىك. ەكى ەل ىنتىماقتاستىعىنىڭ مازمۇنى باي ءارى پەرسپەكتيۆاسى زور. ءبىرقاتار بىرەگەي جوبا قولعا الىندى. ەلدەرىمىز اراسىنداعى قارىم-قاتىناستىڭ ستراتەگيالىق سيپاتى تۋرالى ايتقان كەزدە، ەڭ الدىمەن، مۇناي مەن گاز، كولىك-لوگيستيكا، سيفرلاندىرۋ، اۋىل شارۋاشىلىعى، يندۋستريا جانە باسقا دا سالالار ويعا ورالادى، - دەدى مەملەكەت باسشىسى.

ازەربايجان ميللي ءماجىلىسىنىڭ ءتوراعاسى پارلامەنتارالىق بايلانىستى دامىتۋعا جان-جاقتى قولداۋ كورسەتكەنى ءۇشىن پرەزيدەنت قاسىم-جومارت توقايەۆقا العىس ايتتى.

- ءسىزدىڭ بۇگىنگى ساپارىڭىز ەلدەرىمىز اراسىندا قالىپتاسقان دوستىق، باۋىرلاستىق قاتىناستاردىڭ دامۋىنا ەرەكشە ۇلەس قوساتىنىنا سەنىمدىمىن. قازىرگى تاڭدا ءبىز ستراتەگيالىق سەرىكتەستىك جانە وداقتاستىق قاتىناستار تۋرالى اڭگىمە قوزعاپ وتىرمىز. مەن بۇگىنگى كەزدەسۋلەردە قوعامنىڭ ءارتۇرلى سالالارىنداعى قاتىناستاردى دامىتۋ جونىندە ءبىرقاتار ماڭىزدى ماسەلە تالقىلانعانىنان حاباردارمىن. سونداي-اق ەكى ەلدىڭ پارلامەنتتەرى اراسىندا تەرەڭ ىسكەرلىك بايلانىستار ورناعانىن زور ماقتانىشپەن ءارى ريزاشىلىقپەن ايتا الامىن، - دەدى ساگيبا گافاروۆا.