پرەزيدەنت: از حالىقتاردىڭ انا تىلىندە سويلەۋىنە قۇرمەتپەن قاراۋ قاجەت

استانا. KAZINFORM - مەملەكەت باسشىسى قاسىم-جومارت توقايەۆ استانا حالىقارالىق فورۋمىندا قازاقستان ۇستانىپ وتىرعان «بىرلىگىمىز - ءارالۋاندىقتا» قاعيداتىنىڭ ءمانىن ءتۇسىندىردى.

- جاھاندىق قاۋىپسىزدىككە تونگەن قاتەرگە تەك گەوساياسي سيپات تۇرعىسىنان قاراماۋ كەرەك. مۇنى مويىنداعان ءجون. الەمدەگى قازىرگى احۋال وزگەرىپ جاتىر. مۋلتيلاتەراليزمنىڭ ءۇنى قۇمىققاندا، پروتەكتسيونيزم ءورشيدى. وسىناۋ بەي-بەرەكەت كەزەڭدەگى ءبىزدىڭ مىندەتىمىز - ىنتىماقتى قاتاڭ ساقتاۋ، ىدىراعان تۇسىن قايتا قالپىنا كەلتىرۋ. قازاقستان قازىرگىدەي الماعايىپ زاماندى سىندارلى ىقپالداستىق تۇرعىسىنان قاراستىرادى، - دەدى قاسىم-جومارت توقايەۆ.

مەملەكەت باسشىسى قازاقستان سىرتقى ساياساتتا جىككە بولىنبەي ديالوگقا كەلۋدى، كەز كەلگەن ەلدىڭ ەگەمەندىگىن قۇرمەتتەۋدى باسشىلىققا الاتىنىن اتاپ ءوتتى.

- اسىرەۇلتشىلدىق تانىتىپ، وزگە حالىقتاردىڭ تاريحى مەن مادەني داستۇرلەرىن مەنسىنبەۋگە جول بەرىلمەيدى. از حالىقتاردىڭ انا تىلىندە سويلەپ، ءتول مادەنيەتىن دارىپتەۋىنە قۇرمەتپەن قاراۋ قاجەت. سوندىقتان قازاقستاندا «بىرلىگىمىز - ءارالۋاندىقتا» قاعيداتىن قاتاڭ ۇستانامىز. - دەدى پرەزيدەنت.

ايتا كەتەيىك، ەلوردادا مەملەكەت باسشىسى قاسىم-جومارت توقايەۆتىڭ قاتىسۋىمەن استانا حالىقارالىق فورۋمى ءوتىپ جاتىر.

فورۋمعا 7000 نان استام قاتىسۋشى تىركەلگەن. ەۋروپا، ورتالىق ازيا، تاياۋ شىعىس پەن افريكا ەلىنەن ب ۇ ۇ، ا ا ۇ، ح ك ۇ جانە د ز م ۇ سياقتى جەتەكشى حالىقارالىق ۇيىمداردىڭ اتىنان 160 تان استام سپيكەر شاقىرىلعان. ەكى كۇن بويى ولار ءتۇرلى سالانىڭ ساراپشىلارىمەن بىرلەسىپ، مەملەكەتارالىق ىنتىماقتاستىق مودەلىن، جاڭا جاھاندىق ارىپتەستىك قۇرۋدىڭ كەلەشەگىن تالقىلايدى.

بۇعان دەيىن فورۋمنىڭ مارتەبەلى مەيماندار قاتارىندا رۋاندا رەسپۋبليكاسىنىڭ پرەزيدەنتى پول كاگامەنى، البانيا پرەمەر-ءمينيسترى ەدي رامانى، حورۆاتيا رەسپۋبليكاسىنىڭ پرەمەر-ءمينيسترى اندرەي پلەنكوۆيچتى، قاتار پرەمەر-ءمينيسترى - سىرتقى ىستەر ءمينيسترى شەيح مۇحاممەد بەن ابدۋلراحمان ءال ءتاني بار ەكەنى حابارلانعان بولاتىن.

اۆتور

ەسىمجان ناقتىباي