پرەزيدەنت ايتقان 162 وليگارحتىڭ سانى 2 جىل ىشىندە قالاي وزگەردى-ۆيتسە- مينيستر جاۋابى
قارجى ۆيتسە- ءمينيسترى ەرجان ءبىرجانوۆ 2025-جىلى كۇشىنە ەنەتىن سالىق كودەكسىن تالقىلاعان جيىندا قازاقستانداعى بايلىقتىڭ تەڭ جارتىسىن يەمدەنىپ وتىر دەلىنەتىن 162 ادامنىڭ ءتىزىمى تۋرالى پىكىر ءبىلدىردى، دەپ حابارلايدى Kazinform.
«قاڭتار وقيعاسىنان كەيىن پرەزيدەنت ق. توقايەۆ ەلدەگى بايلىقتىڭ تەڭ جارتىسىن 162 ادام يەمدەنىپ وتىرعانىن ايتقان ەدى. سودان بەرگى ەكى جىلدا 162 ادامنىڭ ءتىزىمى قىسقاردى ما، ۇزاردى ما؟ ولاردىڭ يەلىگىندەگى بايلىقتىڭ ۇلەسى 50 پايىزدان تومەندەدى مە، الدە اسىپ كەتتى مە؟»- دەپ سۇرادى جۋرناليست.
ۆيتسە-ءمينيستردىڭ سوزىنشە، ول ءتىزىم قۇپيا بولعاندىقتان، ناقتى مالىمەت بەرۋ قيىن.
«قاڭتار وقيعاسىنان كەيىن سونداي اقپارات بولعان ەدى. قازىرگى تاڭدا بۇل جۇمىستى زاڭدى دەڭگەيگە جەتكىزۋ ءۇشىن زاڭسىز يەمدەلگەن اكتيۆتەردى قايتارۋ تۋرالى زاڭ قابىلداندى، باس پروكۋراتۋرادا ارنايى كوميتەت قۇرىلدى. ءبىز سول كوميتەت اياسىندا جۇمىس توبىنا كىرەمىز، بىرگە جۇمىس اتقارىلىپ جاتىر. 11 ايدىڭ قورىتىندىسى بويىنشا 1 تريلليون تەڭگەدەي قايتارىلعانىن بىلەسىزدەر. بۇل جۇمىستى زاڭدى دەڭگەيدە جالعاستىرۋ ءۇشىن قوعامدىق ۇيىم وكىلدەرى بار ارنايى جۇمىس توبى قۇرىلعان. ءتىزىمنىڭ قالاي قالىپتاساتىنىن، باسقا دا ماسەلەلەردى ۇكىمەت باسشىسىمەن بىرگە ۇدايى قاراپ وتىرادى. قازىرگى تاڭدا بۇل جۇمىستى باس پروكۋراتۋرا قاداعالاپ وتىرادى. دەگەنمەن سالىق جانە كەدەندىك تەكسەرۋ كەزىندە بولعان زاڭسىزدىقتار بويىنشا اقپارات بەرۋ ارقىلى كومەك كورسەتىپ جاتىرمىز»، - دەدى قارجى ءمينيسترىنىڭ ورىنباسارى.
ەرجان ءبىرجانوۆ اتالعان 162 ادامنىڭ ءتىزىمىن كورۋگە قۇزىرەتى جوق ەكەنىن اتاپ ءوتتى.
«ول تىزىمدە 162 ادام بار ما، 200 ادام بار ما، ول جاعى جاريا ەتىلگەن جوق. ءوزىڭىز بىلەسىز ونىڭ سەبەپتەرى بار. باس پروكۋراتۋرا تۇسىنىكتەمە بەرگەن. سەبەبى قازىر بۇل ازاماتتار ۇلكەن مەكەمەلەردىڭ قۇرىلتايشىلارى نەمەسە باسشىلارى بولىپ كەلەدى. قازىر ولاردى جاريا ەتەتىن بولسا، رەپۋتاتسيالىق قاتەرلەر بار. ونىڭ ۇستىنە يەلىگىندەگى سومانى دالەلدەپ، ءوندىرىپ العانى تۋرالى سوڭعى دەرەكتەر جوق. سوندىقتان باس پروكۋراتۋرانىڭ شەڭبەرىندە ءتىزىم قۇرىلىپ، قاراجات قايتارۋ جۇمىستارى جۇرگىزىلەدى. ءبىز بۇل جۇمىستا باستى ءرولدى اتقارمايمىز. مەنىڭ ول دەرەككە قولىم جەتكىلىكتى ەمەس. سەبەبى تەك جۇمىس توبىنا كىرەتىن ادامدار عانا ونى قاراستىرىپ وتىر. سوندىقتان ناقتى مالىمەت بەرە المايمىن. جالپى ول ءتىزىمدى جاريا ەتۋگە زاڭ شەڭبەرىندە مۇمكىندىك جوق»،-دەدى ەرجان ءبىرجانوۆ.
