پرەزيدەنت: ايەلدى قۇرمەتتەي بىلگەن قوعام - مادەنيەتتى، وركەنيەتتى قوعام
استانا. KAZINFORM - پرەزيدەنت حالىقارالىق ايەلدەر كۇنىنە ارنالعان مەرەكەلىك ءىس- شاراعا قاتىسىپ، ايەلدەر قاۋىمىن مەرەكەمەن قۇتتىقتاپ، ءسوز سويلەدى، دەپ حابارلايدى اقوردانىڭ باسپا ءسوز قىزمەتى.
«8-ناۋرىز - كوكتەم مەرەكەسى. بۇل - سۇلۋلىقتىڭ، مەيىرىم مەن جىلۋلىقتىڭ سيمۆولىنا اينالعان مەرەكە. ءبىز ەر- ازامات بولىپ، سىزدەردى جوعارى باعالايمىز، قۇرمەتتەيمىز جانە جاقسى كورەمىز. نازىك جاندارعا دەگەن ءبىزدىڭ ىقىلاسىمىز، ءىلتيپاتىمىز ءاردايىم ەرەكشە. جالپى، ايەلدى قۇرمەتتەي بىلگەن قوعامدى مادەنيەتتى، وركەنيەتتى قوعام دەۋگە بولادى. دانا حالقىمىز قاشاندا اناسىن ارداقتاپ، ارۋلارىن سىيلاي بىلگەن. قىزدارىن قادىرلەپ، تورىنە شىعارعان. بۇل - ەجەلدەن قانىمىزعا سىڭگەن اسىل قاسيەت»، - دەدى قاسىم- جومارت توقايەۆ.
مەملەكەت باسشىسى ەلدىكتىڭ جۇگىن ەر- ازاماتتارمەن قاتار كوتەرىپ، ادال ەڭبەك ەتىپ جۇرگەن ايەلدەر قاۋىمىنا العىس ايتتى. سونداي-اق مەملەكەت تاراپىنان ولارعا ءاردايىم قولداۋ كورسەتىلەتىنىن جەتكىزدى.
- مەنىڭ باستاماممەن وكىلدى بيلىك سالاسىندا سىزدەرگە ارنايى كۆوتا ءبولىندى. قازىرگى تاڭدا پارلامەنت پەن ءماسليحاتتارداعى ايەلدەردىڭ ۇلەسى ارتتى. بۇل باعىتتاعى جۇمىس جالعاسا بەرەدى. قىز-كەلىنشەكتەر وتانىمىزدى دامىتۋعا ەلەۋلى ۇلەس قوسىپ جاتىر. ءوز كاسىبىن دوڭگەلەتىپ جۇرگەن بەلسەندى ايەلدەرىمىز از ەمەس. سونداي- اق وندىرىستە، عىلىمدا جانە سپورتتا تابىسقا جەتكەن ارۋلارىمىز كوپ. قازاقستانداعى ۇستازداردىڭ باسىم كوپشىلىگى - ايەلدەر. سىزدەر جاس ۇرپاقتى وتانشىلدىققا، ءبىلىمپازدىققا، ەڭبەكقورلىققا باۋلىپ جۇرسىزدەر. ۇلت ساۋلىعىن جاقسارتۋعا زور ەڭبەك ءسىڭىرىپ كەلەسىزدەر. قازاقستاننىڭ كوركەيۋىنە ەلەۋلى ۇلەس قوسىپ جۇرگەن وسىنداي جاندار زور قۇرمەتكە لايىق. بۇل - كەرەمەت ءۇردىس، - دەدى پرەزيدەنت.
سالتاناتتى جيىندا مەملەكەت باسشىسى «ارۋ-انا» ۇزدىك ايەلدەر جوباسى بايقاۋىنىڭ جەڭىمپازدارىن ماراپاتتادى. بۇل جولى ماراپات ءتۇرلى سالادا الەۋمەتتىك ماڭىزى بار جوبالاردى جۇزەگە اسىرىپ، ازاماتتىق قوعامنىڭ دامۋىنا ەلەۋلى ۇلەس قوسىپ جۇرگەن قىز-كەلىنشەكتەرگە التى نوميناتسيا بويىنشا تابىستالدى.
«ارۋ-انا» بايقاۋىنىڭ جەڭىمپازدارى:
«اۋىل ايەلدەرىن دامىتۋعا ارنالعان ۇزدىك جوبا» نوميناتسياسى بويىنشا - ەلشىبايەۆا باقىتگۇل قازەزباي قىزى؛
«عىلىم سالاسىنداعى ۇزدىك جوبا» نوميناتسياسى بويىنشا - شاكۋليكوۆا گۇلزادا تاڭىربەرگەن قىزى؛
«ازاماتتىق سانا- سەزىمدى دامىتۋ باعىتىنداعى ۇزدىك جوبا» نوميناتسياسى بويىنشا - احمەدجانوۆا ءاليا سەرىكبول قىزى؛
«ۇلتتىق مادەني مۇرانى ناسيحاتتاۋ باعىتىنداعى ۇزدىك جوبا» نوميناتسياسى بويىنشا - ميحالەۆا اناستاسيا اناتوليەۆنا؛
«اگروبيزنەس سالاسىنداعى ۇزدىك جوبا» نوميناتسياسى بويىنشا - ارقاشبايەۆا بوتاگوز ماحامبەتقالي قىزى؛
«كرەاتيۆتى يندۋستريا سالاسىنداعى ۇزدىك جوبا» نوميناتسياسى بويىنشا - ەدىلبەكوۆا ءمادينا ەدىلبەك قىزى؛
سالتاناتتى جيىننان كەيىن مەملەكەت باسشىسى قاسىم- جومارت توقايەۆ 8-ناۋرىز - حالىقارالىق ايەلدەر كۇنىنە ارنالعان «ايەلمەن الەم ادەمى» اتتى مەرەكەلىك كونسەرتتى تاماشالادى.
