پرەزيدەنت: اۋىل شارۋاشىلىعى - ءبىز ءۇشىن تابىستى سالا
استانا. KAZINFORM — پرەزيدەنت اقمولا وبلىسىنداعى اۋىل شارۋاشىلىعى كاسىپورىندارىنىڭ جەتەكشىلەرىمەن سالانىڭ جاي-كۇيى، شارۋالاردىڭ جەتىستىكتەرى، سونداي-اق قوردالانعان ماسەلەلەرى جونىندە اڭگىمەلەستى.
بۇل تۋرالى اقوردانىڭ باسپا ءسوز قىزمەتى حابارلادى.
پرەزيدەنتتىڭ سوزىنشە، باستى مىندەت - اۋىل شارۋاشىلىعىندا تەرەڭ وڭدەۋ ءوندىرىسىن دامىتۋ.
- بيىل اۋا رايى قولايلى. ۇكىمەت قولداۋ كورسەتىپ وتىر. جانار-جاعارمايمەن قامتاماسىز ەتىپ، الدىن الا جەڭىلدەتىلگەن نەسيە بەرۋدە. استىق ءتۇسىمى جاقسى بولادى دەپ ويلايمىز. بارشاڭىزعا تابىس تىلەيمىن. جولداۋدا اتاپ وتكەنىمدەي، باستى مىندەت - اۋىل شارۋاشىلىعىندا تەرەڭ وڭدەۋ ءوندىرىسىن دامىتۋ. بىلتىر اۋىل شارۋاشىلىعىنداعى ءونىم كولەمى 8 تريلليون 250 ميلليارد تەڭگەنى قۇرادى. بۇل كوپ تە، از دا ەمەس. وڭىردەگى باسقا ەلدەرمەن سالىستىرعاندا اۋىل شارۋاشىلىعى جاقسى ناتيجەگە قول جەتكىزدى. ءبىراق ىشكى جالپى ءونىم كولەمىنە شاققاندا، بۇل 6 پايىز عانا. ياعني ەكونوميكاداعى اۋىل شارۋاشىلىعىنىڭ ۇلەسىن ارتتىرۋ قاجەت. اۋىل شارۋاشىلىعى - ءبىز ءۇشىن تابىستى سالا. 12 ميلليون توننا بيداي ەكسپورتتاۋ الەۋەتى - وتە جوعارى كورسەتكىش. قازىردىڭ وزىندە استىقتى ەۋروپا ەلدەرى ساتىپ الىپ جاتىر. جولداۋدا ايتقانىمداي، استىقتىڭ العاشقى لەگى، شامامەن 15 مىڭ توننا بيداي ۆەتنامعا جولداندى، - دەدى مەملەكەت باسشىسى.
قاسىم-جومارت توقايەۆ بيىل قاراشا ايىندا اۋىل شارۋاشىلىعى ەڭبەككەرلەرىنىڭ ەكىنشى فورۋمى وتەتىنىن ايتتى. وندا اگروونەركاسىپ كەشەنىن دامىتۋ جانە مەملەكەتتىك قولداۋ ماسەلەلەرى قاراستىرىلادى.
ايتا كەتەيىك، مەملەكەت باسشىسى اقمولا وبلىسىنا جۇمىس ساپارىمەن بارعانىن جازعان ەدىك.
وسىعان دەيىن توقايەۆ اقمولا وبلىسىنداعى ەگىن جيناۋ ناۋقانىمەن تانىستى.
