پرەزيدەنت استانا ينفراقۇرىلىمىن باسقارۋدا АІ پايدالانۋدى قولدايدى
استانا. KAZINFORM - مەملەكەت باسشىسى Presight.AI كومپانياسىنىڭ باسقارما ءتوراعاسى توماس پراموتەدحامدى قابىلدادى، دەپ حابارلايدى اقوردانىڭ باسپا ءسوز قىزمەتى.
كەزدەسۋ بارىسىندا قازاقستاندا ونىمدىلىگى جوعارى ەسەپتەۋ، سيفرلىق ترانسفورماتسيا جانە وزىق تەحنولوگيالاردى ەنگىزۋ باعىتىنداعى ىنتىماقتاستىقتى ودان ءارى نىعايتۋ ماسەلەلەرى قاراستىرىلدى.
پرەزيدەنت سيفرلىق ينفراقۇرىلىمدى دامىتۋدىڭ ماڭىزىن اتاپ ءوتىپ، ەلىمىزدە سۋپەركومپيۋتەر كلاستەرىنىڭ نەگىزىن قالاۋ ستراتەگيالىق مانگە يە ەكەنىنە توقتالدى.
توماس پراموتەدحام قاسىم-جومارت توقايەۆقا اتالعان جوبانىڭ جۇزەگە اسىرىلۋى جونىندە مالىمەت بەردى.
تەحنولوگيانى لوكاليزاتسيالاۋ جانە قازاقستاندىق كومپانيالاردى بىرلەسكەن جوبالارعا تارتۋ ماسەلەلەرىنە ايرىقشا نازار اۋدارىلدى. Presight.AI باسقارما ءتوراعاسى وتاندىق IT كومپانيالاردىڭ بىلىكتىلىك دەڭگەيىن جوعارى باعالادى جانە ولارمەن ۇزاقمەرزىمدى سەرىكتەستىك قۇرۋعا قاتىستى نيەتىن راستادى.
سونىمەن قاتار استانا اكىمدىگىمەن بىرلەسە اتقارىلاتىن Smart City جوباسى تالقىلاندى.
مەملەكەت باسشىسى قالا ينفراقۇرىلىمىن باسقارۋ ىسىنە جاساندى ينتەللەكت شەشىمدەرىن پايدالانۋعا قولداۋ ءبىلدىردى. اتاپ ايتقاندا، Alem.AI حالىقارالىق جاساندى ينتەللەكت ورتالىعىنىڭ بازاسىندا قالا قىزمەتتەرىنىڭ تيىمدىلىگىن ارتتىراتىن احۋال ورتالىعى قۇرىلماق.
قاسىم-جومارت توقايەۆ ەلىمىزدىڭ سيفرلىق ترانسفورماتسياسىنا جانە تەحنولوگيالىق ورلەۋىنە سەپتىگىن تيگىزەتىن نەگىزگى باستامالار اياسىنداعى ىنتىماقتاستىقتى جالعاستىرۋ ماڭىزدى ەكەنىن ايتتى.
