پرەزيدەنت «استانا» حالىقارالىق قارجى ورتالىعىنىڭ باسشىسى رەنات بەكتۇروۆتى قابىلدادى

AIFC attracted over $11bln of investments to Kazakhstan
Photo credit: Akorda

استانا. KAZINFORM - رەنات بەكتۇروۆ ا ح ق و- نىڭ بىلتىرعى جانە بيىلعى I توقساندا اتقارعان جۇمىسىنىڭ ناتيجەلەرى بايانداپ، ورتالىقتى دامىتۋ جوسپارىمەن تانىستىردى.

قارجى ورتالىعى ىسكە قوسىلعان ساتتەن بەرى ەلىمىزگە 11 ميلليارد دوللاردان استام (2023 -جىلعى جانە وسى جىلدىڭ العاشقى 3 ايىنداعى 3,5 ميلليارد دوللار قارجىنى قوسا العاندا) ينۆەستيتسيا تارتۋعا اتسالىسقان.

بۇل 2025 -جىلعا الدىن الا بەلگىلەنگەن ماقساتتى كورسەتكىشتەن اسقان.

وتكەن جىلى ا ح ق و- دا تىركەلگەن كومپانيالاردىڭ سانى 670 تەن (جالپى الەمنىڭ 78 ەلىنەن 2600 دەن اسا كومپانيا) اسقانى جونىندە مالىمەت بەرىلدى. بۇل - رەكوردتىق كورسەتكىش.

بىلتىر جانە وسى جىلدىڭ العاشقى ءۇش ايىندا ورتالىق قاتىسۋشىلارى مەملەكەت بيۋدجەتىنە 48,7 ميلليارد تەڭگە سالىق تولەگەن.

داۋلاردى شەشۋدە ا ح ق و سوتى مەن حالىقارالىق اربيتراج ورتالىعى سياقتى ينستيتۋتتار تابىستى جۇمىس ىستەپ جاتىر. 2023 -جىلى 767 كوممەرتسيالىق ءىس قارالعان.

پرەزيدەنت قارجى ورتالىعىن ودان ءارى دامىتۋعا قاتىستى ءبىرقاتار وزەكتى مىندەتتى ايقىنداپ بەردى. اتاپ ايتقاندا، ا ح ق و- نىڭ ءوڭىر ءۇشىن جاسىل قور تارتۋ جانە ورتا ءدالىزدى دامىتۋ ىسىندەگى رولىنە توقتالدى.

ەلىمىزدەگى «جاسىل» وبليگاتسيالار مەن كرەديتتەردىڭ 60 پايىزدان استامى ا ح ق و جاسىل قارجى ورتالىعىنىڭ قولداۋىمەن بەرىلدى.

قارجى ورتالىعىنىڭ يۋريسديكتسياسىندا ورتا ءدالىز جوباسى اياسىندا بىرلەسكەن كاسىپورىندار جۇمىس ىستەپ جاتىر.

قاسىم-جومارت توقايەۆ قازىرگى جاعدايدا مامىلەلەر جاساۋ ءۇشىن ا ح ق و ينفراقۇرىلىمىن بەلسەندى پايدالانا وتىرىپ، قازاقستان ەكونوميكاسىنا ينۆەستيتسيا تارتۋعا كومەكتەسەتىن بارلىق مەملەكەتتىك ورگان مەن وعان جەتەكشىلىك ەتەتىن قارجى ينستيتۋتتارىنىڭ كۇش-جىگەرىن بىرىكتىرۋ قاجەت ەكەنىنە نازار اۋداردى.

سوڭعى جاڭالىقتار