پرەزيدەنت ارۋلاردى كوكتەم مەرەكەسى - حالىقارالىق ايەلدەر كۇنىمەن قۇتتىقتادى
استانا. KAZINFORM - مەملەكەت باسشىسى قاسىم-جومارت توقايەۆتىڭ قاتىسۋىمەن 8-ناۋرىز - حالىقارالىق ايەلدەر كۇنىنە ارنالعان سالتاناتتى جيىن باستالدى. بۇل تۋرالى اقوردا ءمالىم ەتتى.
- بۇگىن مەن بارشاڭىزدى كوكتەم مەرەكەسى - حالىقارالىق ايەلدەر كۇنىمەن شىن جۇرەكتەن قۇتتىقتايمىن! بۇل مەيرامدى شىن مانىندە سۇلۋلىقتىڭ كورىنىسى دەۋگە بولادى. سەبەبى ايەل جانى قاشاندا ادەمىلىككە جاقىن. ارۋلارىمىز الەمگە سۇيىسپەنشىلىكپەن قاراپ، جان- جاعىنا جاقسىلىق شاراپاتىن سىيلاپ جۇرەدى. «ايەل ءبىر قولىمەن بەسىكتى تەربەتسە، ءبىر قولىمەن الەمدى تەربەتەدى» دەگەن ءسوز بەكەر ايتىلماعان. ايەل - شاڭىراقتىڭ شىراعى، ۇلتتىڭ ۇيىتقىسى. انا - تىرشىلىك پەن بەرەكەنىڭ باستاۋى، ادامزات بويىنداعى بار ىزگىلىكتىڭ قاينار كوزى. انانىڭ ايالى الاقانى مەن شەكسىز مەيىرىمى ءار ۇيگە جىلىلىق بەرەدى. سالت-ءداستۇرىمىز بەن انا ءتىلىمىزدىڭ بۇگىنگى كۇنگە جەتۋى دە - ەڭ الدىمەن، انالاردىڭ ارقاسى. ءومىردىڭ ءمانى دە، تىرشىلىكتىڭ ءسانى دە - سىزدەر! سوندىقتان بۇگىنگى مەيرامدا بارشا ەر-ازاماتتار وزدەرىڭىزگە اق تىلەگىن ارناپ، ىقىلاس- ءىلتيپاتىن ءبىلدىرىپ جاتىر. سولاردىڭ ىشىندە مەن دە مەملەكەت باسشىسى رەتىندە ايەلدەرگە تىلەگىمدى، لەبىزىمدى ايتىپ تۇرمىن، - دەدى پرەزيدەنت قۇتتىقتاۋىندا.
قاسىم-جومارت توقايەۆ قازاقستاننىڭ سان ءتۇرلى سالادا جەتىستىككە جەتۋىنە قىز- كەلىنشەكتەر مول ەڭبەك سىڭىرگەنىن ايتتى.
- حالقىمىزدا ەرلىك پەن ەلدىكتىڭ تۋىن بيىك ۇستاعان ارۋلار از ەمەس. ولاردىڭ ەسىمى ەل شەجىرەسىنە التىن ارىپپەن جازىلعان. تۇمار مەن بوپاي حانىمداردىڭ، دومالاق انا، زەرە جانە ۇلپان انالاردىڭ، ءاليا، مانشۇك، حيۋاز سەكىلدى باتىر قىزدارىمىزدىڭ اتى ەل جادىندا. سىزدەردى اقىلى مەن اجارى، دانالىعى مەن دارالىعى كەلىسكەن قازاق ايەلىنىڭ ءىزباسارى دەۋگە بولادى. ايەلدەر قاۋىمى كۇردەلى كەزەڭدەردە ايانباي ەڭبەك ەتتى، وتانىمىزدىڭ ءوسىپ-وركەندەۋىنە بەلسەنە اتسالىستى. ۇرپاق تاربيەسى - ۇلت تاربيەسى. بۇگىندە سىزدەر ساناسى سەرگەك، ويى ازات ۇرپاق ءوسىرىپ، وتانىمىزدىڭ وركەن جايۋىنا ايرىقشا ۇلەس قوسىپ كەلەسىزدەر. قازاقستاننىڭ سان ءتۇرلى سالادا جەتىستىككە جەتۋىنە قىز- كەلىنشەكتەرىمىز مول ەڭبەك سىڭىرۋدە. بۇگىن اقورداعا شاقىرىلعان ايەلدەر اراسىندا وتانىمىزعا ءار سالادا ەڭبەك سىڭىرگەن بىلىكتى ماماندار بار. مەن بارشاڭىزعا زور العىس ايتامىن، - دەدى مەملەكەت باسشىسى.
مەملەكەت باسشىسى انالارى الاڭسىز قوعامدا بالالار دا باقىتتى ءومىر سۇرەتىنىن ايتتى.
- قىمباتتى حانىمدار، سىزدەر، الەمگە ادەمىلىك پەن ۇيلەسىم، شاڭىراققا جىلىلىق پەن جايلىلىق سىيلاپ كەلەسىزدەر. سىزدەرگە وسكەلەڭ ۇرپاقتى تاربيەلەۋ، وتباسىلىق قۇندىلىقتاردى ىلگەرىلەتۋ سەكىلدى ايرىقشا جاۋاپكەرشىلىك جۇكتەلگەن. بارلىق سالادا ادال ەڭبەك ەتىپ، تاباندى ءدا تيىمدى جۇمىستارىڭىزبەن مەملەكەتىمىزدىڭ الەۋەتى مەن بەدەلىن نىعايتىپ جۇرسىزدەر. انالارى الاڭسىز قوعامدا بالالار دا باقىتتى ءومىر سۇرەدى. انا مەن بالانىڭ جاعدايى دۇرىس بولسا، الەۋمەتتىڭ جاعدايى دا دۇرىس بولادى. سوندىقتان بولاشاعىن ويلاعان ەل، ەڭ الدىمەن، ايەلدەردىڭ جاعدايىن جاقسارتۋدى ويلايدى، - دەدى قاسىم-جومارت توقايەۆ.
پرەزيدەنت مەملەكەتتىڭ ايەلدەردى بارىنشا قورعاۋعا جانە جان-جاقتى قولداۋعا باسا ءمان بەرەتىنىن اتاپ ءوتتى.
- مەملەكەتىمىز ايەلدەردى بارىنشا قورعاۋعا جانە جان-جاقتى قولداۋعا باسا ءمان بەرەدى. وسى باعىتتا ناقتى جۇمىستار اتقارىلىپ جاتىر. مەنىڭ تاپسىرماممەن وتباسى ينستيتۋتىن نىعايتۋدى كوزدەيتىن ماڭىزدى شارالار قابىلداندى. بارلىق ايماقتا قيىن جاعدايعا تاپ بولعان وتباسىلارعا قولداۋ كورسەتەتىن ورتالىقتار اشىلىپ جاتىر. كوپ بالالى انالاردى قولداۋدىڭ ۇلتتىق مودەلى قالىپتاستى. سونىڭ ارقاسىندا جىل وتكەن سايىن كوپ بالالى وتباسىلاردىڭ سانى ارتىپ كەلەدى، - دەدى ول.
قاسىم-جومارت توقايەۆ ايەلدەردىڭ لاۋازىمدى قىزمەتتەردى جاۋاپكەرشىلىكپەن اتقارىپ جۇرگەنىن جەتكىزدى.
- قازىر ايەلدەر ءتۇرلى سالادا تابىستى ەڭبەك ەتىپ ءجۇر. مەملەكەتتىك قىزمەتشىلەردىڭ جارتىسىنان كوبى - ايەلدەر. ءبىلىم بەرۋ، دەنساۋلىق ساقتاۋ سالاسىنداعى مامانداردىڭ 70 پايىزدان استامى دا - ايەلدەر قاۋىمى. سونداي-اق ولار توتەنشە جاعدايلار، قورعانىس جانە قۇقىق قورعاۋ ورگاندارىندا تابىستى جۇمىس ىستەپ ءجۇر. كوپتەگەن ايەلدەر لاۋازىمدى قىزمەتتەر اتقارادى، سىزدەردىڭ ارالارىڭىزدا دا تابىستى باسشىلار از ەمەس. قىز-كەلىنشەكتەر بيزنەستە دە جەتىستىككە جەتىپ ءجۇر. بويلارىڭىزداعى ماقساتكەرلىك پەن جاسامپازدىق قۋاتى ەڭ باتىل باستامالارىڭىزدى جۇزەگە اسىرۋعا كومەكتەسىپ كەلەدى. بەرىك ازاماتتىق ۇستانىمدارىڭىزدى تانىتىپ، قوعامدىق جۇمىسقا دا جان- جاقتى اتسالىساسىزدار. ماڭىزدى باستامالار مەن حالىققا قاجەتتى الەۋمەتتىك جوبالاردى ىسكە اسىرىپ جۇرسىزدەر. قاي ىسپەن اينالىسساڭىزدار دا جاۋاپكەرشىلىكپەن قاراپ، ۇدايى وڭ ناتيجەگە قول جەتكىزىپ كەلەسىزدەر، - دەدى پرەزيدەنت.
«قازاقستاننىڭ ەڭبەك سىڭىرگەن قۇرىلىسشىسى»، «قازاقستاننىڭ ەڭبەك سىڭىرگەن ونەركاسىپ قايراتكەرى» قۇرمەتتى اتاقتارى العاش رەت تابىستالدى.
- الەمدىك دودالاردا توپ جارىپ، ەلىمىزدىڭ ابىرويىن اسقاقتاتىپ جۇرگەن ارۋلارىمىز دا بار. ءبىز قاجىرلى ەڭبەگىمەن، ەرەن ەرلىگىمەن تانىلعان قىز-كەلىنشەكتەردى ماقتان تۇتامىز. تاۋەلسىزدىك جىلدارى ءوز سالاسىنىڭ ۇزدىگى اتانعان 8 ايەلگە «قازاقستاننىڭ ەڭبەك ەرى» اتاعى بەرىلدى. بيىل ەلىمىزدە - «جۇمىسشى ماماندىقتارى جىلى». قازىر وسى سالاداعى بىلىكتى مامانداردىڭ مارتەبەسىن كوتەرۋ ءۇشىن بەلسەندى جۇمىس جۇرگىزىلىپ جاتىر. مىسالى، مەملەكەتتىك ماراپاتتار جۇيەسىنە جاڭادان 9 قۇرمەتتى اتاق ەنگىزىلدى. بۇگىن وسىنداي ەكى ماراپات العاش رەت تاپسىرىلادى. «قازاقستاننىڭ ەڭبەك سىڭىرگەن قۇرىلىسشىسى» اتاعى ەڭبەك ارداگەرى ولگا شەلۋدكوعا بەرىلەدى. ال ءوندىرىس وزاتى مايرا ەرمانوۆا «قازاقستاننىڭ ەڭبەك سىڭىرگەن ونەركاسىپ قايراتكەرى» اتانىپ وتىر. وسىنداي ناعىز ەڭبەك ادامدارىنا بۇكىل ەل بولىپ قۇرمەت كورسەتىپ، ولاردى جان-جاقتى دارىپتەۋىمىز كەرەك. جۇمىسشى ماماندىقتارى جىلىنىڭ تۇپكى ءمانى دە - وسى، - دەدى مەملەكەت باسشىسى.
ەسكە سالا كەتەيىك، مەملەكەتتىك ناگرادالار جۇيەسىنە 9 جاڭا قۇرمەتتى اتاق ەنگىزىلگەن بولاتىن.
اۆتور
باقىتگۇل اباي قىزى
