پرەزيدەنت اقتوبە وبلىسى اكىمىنە ەكولوگيا ماسەلەسىن تەز ارادا شەشۋدى تاپسىردى
مەملەكەت باسشىسى اقتوبە وبلىسىنىڭ اكىمىنە ەكولوگيا ماسەلەسىن تەز ارادا شەشۋدى تاپسىردى، دەپ حابارلايدى Kazinform اقورداعا سىلتەمە جاساپ.
- بۇل جۇمىستى مىندەتتى تۇردە سوڭىنا دەيىن جەتكىزۋىمىز كەرەك. ايتپەسە، حالىققا زيانى كوپ. ەكولوگيا ماسەلەسى وتە وتكىر ءارى وزەكتى. سوندىقتان بۇل پروبلەماعا باسا ءمان بەرۋ قاجەت، - دەدى پرەزيدەنت.
بۇدان بولەك، ءىرى كومپانيا وكىلدەرى مەملەكەت باسشىسىنا وزدەرىنىڭ ينۆەستيتسيالىق جوبالارىن تانىستىردى.
اتاپ ايتقاندا، ERG باس ديرەكتورى سەرىك شاحاجانوۆ اقتوبە وبلىسىندا ەكولوگيالىق ستراتەگيانىڭ ىسكە اسىرىلۋى جونىندە باياندادى.
وسى ماقساتتا 2030-جىلعا دەيىن 228 ميلليارد تەڭگە كولەمىندە ينۆەستيتسيا قۇيۋ جوسپارلانىپ وتىر.
اتالعان ستراتەگيا شەڭبەرىندە اقتوبە فەرروقورىتپا زاۋىتىنداعى 1,2№ بالقىتۋ سەحتارىنىڭ گاز تازارتۋ جۇيەسىن جاڭعىرتۋ جۇمىستارى اياقتالدى.
«س ن پ س-اقتوبەمۇنايگاز» ا ق باس ديرەكتورى لي شۋفەن قاسىم-جومارت توقايەۆقا مۇناي مەن گازدى دايىنداۋ ىسىندە زاماناۋي تەحنولوگيانىڭ ەڭ جوعارى ستاندارتتارىنا ساي كەلەتىن جاڭاجول مۇناي-گاز وڭدەۋ كەشەنىنە قاراستى ءۇشىنشى گاز وڭدەۋ زاۋىتىنىڭ (گ و ز-3) ءبىرىنشى، ەكىنشى جانە ءۇشىنشى كەزەكتە جۇزەگە اسىرىلاتىن جوبالارى تۋرالى ايتتى.
جالپى ينۆەستيتسيا كولەمى — 3,5 تريلليون تەڭگە.
Eni Plenitude Arm Wind كومپانياسىنىڭ باسقارۋشى ديرەكتورى الەكس ستيللاۆاتو قاسىم-جومارت توقايەۆقا قازاقستان اۋماعىندا ىسكە اسىرىلعان جوبالار تۋرالى اقپارات بەردى.
اتاپ ايتقاندا، كاسىپورىن اقتوبە وبلىسىندا «بادامشا-1»، «بادامشا-2» جەل ەلەكتر ستانسيالارىنىڭ، تۇركىستان وبلىسى ءشاۋىلدىر كەنتىنىڭ جانىندا قۋاتى 50 مۆت بولاتىن ءبىرىنشى كۇن ەلەكتر ستانتسياسىنىڭ قۇرىلىسىن جۇزەگە اسىرعان.
سونداي-اق ول ماڭعىستاۋ وبلىسى جاڭاوزەن قالاسىنىڭ ماڭىندا «قازمۇنايگاز» ۇ ك اكسيونەرلىك قوعامىمەن بىرلەسىپ، قۋاتى 250 مۆت بولاتىن جاڭارتىلاتىن ەنەرگيا كوزدەرى+گاز گيبريدتى ەلەكتر ستانتسياسىنىڭ جوباسى ازىرلەنىپ جاتقانىن ايتتى.
KazFeltec ج ش س باسشىسى ەرلان جاڭابەرگەنوۆ مەملەكەت باسشىسىنا قوي جۇنىنەن ەكولوگيالىق تازا ءارى جىلۋ ساقتايتىن ماتەريالدار شىعاراتىن زاۋىتتى ىسكە قوسۋ جوباسىن تانىستىردى. نىسانعا جالپى كولەمى 5,3 ميلليارد تەڭگە ينۆەستيتسيا سالۋ كوزدەلىپ وتىر.
AqtobeCem كومپانياسىنىڭ باس ديرەكتورى ستانيسلاۆ شەرباكوۆ قاسىم-جومارت توقايەۆقا اقتوبە وبلىسىندا جالپى سوماسى 70 ميلليارد تەڭگە بولاتىن سەمەنت كلينكەر وندىرەتىن زاۋىتتىڭ جوباسىن ۇسىندى.
«قازاقبيتۋم» كومپانياسىنىڭ باقىلاۋشى كەڭەسىنىڭ ءتوراعاسى بەكجان مامىت پرەزيدەنتكە سوماسى 32,2 ميلليارد تەڭگەنى قۇرايتىن بيتۋم زاۋىتى-تەرمينالىن سالۋ جوباسى تۋرالى ايتتى.
كەزدەسۋ سوڭىندا مەملەكەت باسشىسى كاسىپكەرلەردىڭ قولعا العان جوبالارىنىڭ تابىستى جۇزەگە اسىرىلۋىنا تىلەكتەستىك ءبىلدىردى.
