پرەزيدەنت اقتاۋداعى ۇشاق اپاتىنا قاتىستى اقپاراتتىق ارانداتۋ مەن فەيككە جول بەرمەۋ ماڭىزدى ەكەنىن ايتتى
استانا. KAZINFORM - مەملەكەت باسشىسى قاسىم-جومارت توقايەۆتىڭ توراعالىعىمەن اقتاۋ قالاسى ماڭىنداعى ۇشاق اپاتىنا بايلانىستى كەڭەس ءوتتى.
باسقوسۋدا مەملەكەت باسشىسى ۇكىمەتتىك كوميسسياعا زارداپ شەككەن شەتەل ازاماتتارىنا قاجەتتى مەديتسينالىق جانە پسيحولوگيالىق تۇرعىدان تولىق كومەك بەرۋدى، قايتىس بولعان قازاقستان ازاماتتارىنىڭ تۋعان- تۋىستارىنا ايرىقشا قامقورلىق كورسەتۋدى تاپسىردى.
ۇكىمەتتىك كوميسسيا مەن باس پروكۋراتۋراعا باسقا قۇزىرەتتى ورگاندارمەن بىرلەسىپ، ۇشاق اپاتىنا جان- جاقتى ءارى وبەكتيۆتى تەرگەۋ جۇرگىزۋ مىندەتى جۇكتەلدى.
پرەزيدەنتتىڭ پىكىرىنشە، بۇل رەتتە اقپاراتتىق ارانداتۋ مەن فەيككە جول بەرمەۋ ماڭىزدى. بۇدان بولەك، قاسىم-جومارت توقايەۆ ەلىمىزدەگى اۆياتسيالىق قاۋىپسىزدىكتىڭ جاي-كۇيىن مۇقيات تەكسەرۋ قاجەت ەكەنىن مالىمدەدى.
كەڭەس بارىسىندا ۇكىمەتتىك كوميسسيا ءتوراعاسى، پرەمەر- ءمينيستردىڭ ورىنباسارى قانات بوزىمبايەۆ، باس پروكۋرور بەرىك اسىلوۆ، ۇلتتىق قاۋىپسىزدىك كوميتەتىنىڭ ءتوراعاسى ەرمەك ساعىمبايەۆ، ىشكى ىستەر ءمينيسترى ەرجان سادەنوۆ جانە دەنساۋلىق ساقتاۋ ءمينيسترى اقمارال ءالنازاروۆا بايانداما جاسادى.
