پرەزيدەنت اناسى تۋرالى اسەرلى جازبا قالدىردى
استانا. KAZINFORM - مەملەكەت باسشىسى قاسىم-جومارت توقايەۆ انالار كۇنى مەرەكەسىنە وراي الەۋمەتتىك جەلىدەگى پاراقشاسىنا اناسى تۇرار شاباربايەۆا تۋرالى ەستەلىككە تولى جازبا قالدىردى.
- بۇگىن - انالار كۇنى! وسى ورايدا انام تۇرار شاباربايەۆا تۋرالى از-كەم ەستەلىكپەن بولىسكىم كەلەدى. ءتورت بالالى ءبىزدىڭ وتباسى قاراپايىم تۇردى. انام ۇزاق ۋاقىت بويى بەلگىلى سەبەپتەرمەن جۇمىس ىستەمەدى، ول كىسى ءۇي جۇمىسىن اتقاردى. جالعىز اسىراۋشىمىز اكەي. ايلىق جالاقىدان بولەك، ول كەي-كەيدە ماقالالارى مەن كىتاپتارىنا قالاماقى الاتىن. مۇنداي كۇندەرى ءبىزدىڭ ۇيدە ناعىز مەرەكە ورنايدى. شەشەي ول كەزدە جاس ايەل بولا تۇرا، كوپ نارسەدەن، ونىڭ ىشىندە اشەكەي زاتتار مەن قىمبات كيىمدەردەن تارتىناتىن. ارينە، ءساندى كيىنىپ، اسەم اشەكەيلەر تاققىسى كەلگەنى تابيعي عوي، الايدا بار ءومىرىن پەرزەنتتەرىنە ارناپ، انالىق پارىزىن قىسقا عۇمىرىنىڭ اقىرىنا دەيىن اتقارىپ ءوتتى. ءتىپتى، قىمبات دۇنيەلەر الاتىنداي مۇمكىندىك تۋعان كەزدە دە، وزىنە ۇناعان زاتتاردى نەمەرەلەرىنە اپەرۋمەن شەكتەلەتىن، - دەپ جازدى پرەزيدەنت.
ول ءوز ءومىرىنىڭ كەڭەس وداعى تاراۋىمەن تۇسپا-تۇس كەلگەن سىندارلى ساتىندە اناسىنىڭ باتىل قولداعانىن ەشقاشان ۇمىتىلمايتىنىن ايتقان.
- سول ءبىر قاۋىرت كۇندەرى ماسكەۋدە قالىپ، رەسەي مەملەكەتىنىڭ سىرتقى ىستەر مينيسترلىگىندە قىزمەت ىستەۋ نەمەسە ەلگە قايتىپ ورالۋدى انىقتاۋ قاجەت ەدى. سوندا انامنىڭ «اكەڭ ءتىرى بولسا، ساعان بىردەن قازاقستاندا قىزمەت ەتۋ كەرەك دەر ەدى» دەپ ايتقانى ەسىمدە. بۇل ءسوز بۇيرىقتاي بولىپ ەستىلدى. شەشەمىز، ارينە، كەيبىر شەنەۋنىكتەردىڭ اياقاستىنان قيساپسىز بايىپ شىعا كەلىپ جاتقانىن ءبىلدى، ءبىراق مۇنداي تىرشىلىكتىڭ بايانسىز جانە اقىرى جاقسىلىققا اپارمايتىنىن جالىقپاي ايتىپ وتىردى، - دەلىنگەن جازبادا.
مەملەكەت باسشىسى اناسىنىڭ قاراپايىم تىرلىك كەشكەنىن، كوزى جۇمىلعانشا كوپ نارسەدەن ءوزىن شەكتەپ وتىرعانىن جازدى.
- ىلعي دا ەل الدىندا ۇياتقا قالماۋ ءۇشىن ءوزىمدى تازا ۇستاۋدى، ەشقاشان كورسەقىزارلىققا بارماۋدى ايتىپ كەڭەس بەرەتىن. انام دا ۇنەمى مەنى قولدايتىن. بالا كۇنىمنەن مەن ونىڭ كوپتەگەن ماعىناسى تەرەڭ مازمۇندى اڭگىمەلەرىن، وي-پىكىرى مەن پايىمداۋلارىن تىڭداپ ءوستىم عوي. اڭگىمەنى جاقسى ايتاتىن جانە مەنىڭ دە ىقىلاستانا تىڭدايتىنىمدى سەزگەن بولار، ءسويتىپ ومىرلىك دۇنيەتانۋىما ولشەۋسىز ىقپال ەتتى. جان-جاعىما بايىپتى قاراپ، ۇستامدى بولۋعا، جاقسىنى ۇيرەنۋگە جانە ودان تەك پايدالىسىن الۋعا ۇيرەتتى. «كۇنى بويى جانە كەشكە نەمەن اينالىساتىنىڭدى تاڭەرتەڭنەن ويلاۋ كەرەك. جيناقى ءجۇرۋ قاجەت، اسىپ-ساسقان ادام ساتسىزدىككە ۇشىرايدى» دەپ جيى ايتاتىن، - دەپ اناسىنىڭ وسيەتىن مىسالعا كەلتىردى.
مەملەكەت باسشىسى اناسى ۇساق-تۇيەك نارسەگە دەيىن تۇگەل ءبىلۋدى قاجەت ساناعانىن تىلگە تيەك ەتتى.
- ول كىسىنىڭ قاتىسۋىنسىز اتا-انالار جينالىسى وتكەن ەمەس. ءتورت بالاسىنىڭ وقىتۋشىلارىنىڭ ءبارىن بىلەتىن. بالالاىق تەنتەكتىگىمىزگە، جەتكىنشەكتىك قۋانىش پەن كۇيىنىش-سۇيىنىشىمىزگە قاتىستى جايلاردى ءتۇپ-تۇگەل سەزىنىپ وتىراتىن. انىعىن ايتقاندا، انامىزدان جاسىراتىن قۇپيامىز بولعان جوق. ول كىسى ءبىزدىڭ ومىرمەن عۇمىر كەشتى، ال ءبىز ونىڭ ءومىرىنىڭ اجىراماس بولشەگى ەدىك. انالاردىڭ قادىرىن ءبىلىپ، ءاردايىم قۇرمەت كورسەتىپ، ارداقتاپ جۇرىڭىزدەر! - دەپ جازدى.
ەسكە سالا كەتەيىك، بۇگىن قازاقستاندىقتار انالار كۇنىن مەرەكەلەپ جاتىر.
