پرەزيدەنت: امال كەلگەندە اماندىق ءبىلىسۋ - كونە زاماننان جالعاسقان ايرىقشا ءداستۇرىمىز

استانا. KAZINFORM - مەملەكەت باسشىسى قاسىم-جومارت توقايەۆ امال كۇنىمەن قۇتتىقتادى، دەپ حابارلايدى اقوردانىڭ باسپا ءسوز قىزمەتى.

- قۇرمەتتى وتانداستار! سىزدەردى ءاز- ناۋرىزدىڭ باستاۋى - امال كۇنىمەن شىن جۇرەكتەن قۇتتىقتايمىن! امال كەلگەندە اماندىق ءبىلىسۋ - كونە زاماننان جالعاسقان ايرىقشا ءداستۇرىمىز. قىستان شىعىپ، شۋاقتى كوكتەمگە امان جەتكەن اعايىن وسى كۇنى ءبىر-بىرىمەن كورىسەدى. جاستار ۇلكەندەرگە سالەم بەرىپ، قاريالاردىڭ باتاسىن الادى. حالقىمىز ەجەلدەن وسىنداي عۇرىپتار ارقىلى باۋىرمالدىق پەن جاناشىرلىقتى، تاتۋلىق پەن مەيىرىمدىلىكتى دارىپتەپ، ۇرپاقتىڭ بويىنا اسىل قاسيەتتەردى سىڭىرە بىلگەن. مۇنىڭ ءبارى قازىرگى قازاقستاننىڭ ادال ازامات تۇجىرىمداماسىمەن تولىق ۇندەسەدى. بۇگىندە ناۋرىز مەيرامى الدىنداعى كورىسۋ عۇرپى قايتا جاڭعىرىپ، جالپى ۇلتتىق سيپات الا باستادى. وسى بىرەگەي ءداستۇرىمىز ەلىمىزدىڭ ىرىستى ىنتىماعى مەن بەرەكەلى بىرلىگىن نىعايتا تۇسەدى دەپ سەنەمىن. ءار شاڭىراق شاتتىق پەن قۋانىشقا كەنەلسىن! بارشاڭىزعا زور دەنساۋلىق، باق-بەرەكە تىلەيمىن! ايدان امان، جىلدان ەسەن بولايىق! - دەدى پرەزيدەنت.

وسىعان دەيىن ماڭعىستاۋداعى وتپان تاۋدا «بىرلىك وتى» جاعىلعانىن جازعان ەدىك.

سونىمەن قاتار، Kazinform ءتىلشىسى بۇگىنگى مەرەكەگە وراي ميفولوگتىڭ كورىسۋ نەمەسە امال كۇنىنىڭ پايدا بولۋىنا بايلانىستى پايىمدارىن زەردەلەپ كوردى.

اۆتور

اينۇر تۋماقبايەۆا