پرەزيدەنت: العىس ايتۋ كۇنى - ازاماتتارىمىزدىڭ ءبىر-بىرىنە دەگەن قۇرمەتىنىڭ سيمۆولى
استانا. KAZINFORM - مەملەكەت باسشىسى قاسىم-جومارت توقايەۆ قازاقستان حالقىن العىس ايتۋ كۇنىمەن قۇتتىقتادى. بۇل تۋرالى اقوردانىڭ باسپا ءسوز قىزمەتى حابارلادى.
قۇرمەتتى وتانداستار!
بارشاڭىزدى العىس ايتۋ كۇنىمەن شىن جۇرەكتەن قۇتتىقتايمىن!
بۇل جارقىن مەرەكە ازاماتتارىمىزدىڭ ءبىر- بىرىنە دەگەن ريزاشىلىعى مەن تىلەكتەستىگىنىڭ، شىنايى قۇرمەتىنىڭ سيمۆولى سانالادى.
حالقىمىز عاسىرلار بويى بەرەكەلى بىرلىگى مەن تۋعان جەرگە دەگەن شەكسىز سۇيىسپەنشىلىگىنىڭ ارقاسىندا ەڭ كۇردەلى سىناقتار مەن قاتەرلەردى ەڭسەرە ءبىلدى. وسى ىرگەلى قۇندىلىقتار جالپىۇلتتىق بىرەگەيلىگىمىزدىڭ اجىراماس بولىگىنە اينالدى.
بيىل قازاقستان حالقى اسسامبلەياسىنىڭ قۇرىلعانىنا 30 جىل تولادى. بۇل قۇرىلىم قوعامداعى ءوزارا تۇسىنىستىك پەن كەلىسىمدى نىعايتۋعا ولشەۋسىز ۇلەس قوسىپ كەلەدى.
قازىر ءبىزدىڭ الدىمىزدا جۇيەلى ءارى اۋقىمدى رەفورمالاردى جۇزەگە اسىرۋ مىندەتى تۇر. وسى ورايدا، ءار ازاماتتىڭ ەل تاعدىرىنا جاۋاپتى ەكەنىن تولىق سەزىنە ءبىلۋى ماڭىزدى.
ءبىز جۇدىرىقتاي جۇمىلا بىلسەك قانا، ۇيلەسىمدى جانە ادىلەتتى قوعام قۇرۋ جولىندا جەتىستىككە جەتەمىز.
تۋعان ەلدىڭ يگىلىگى ءۇشىن ادال ءارى تىنىمسىز ەڭبەك ەتىپ جۇرگەن بارشا وتانداستارىما العىس ايتامىن.
سىزدەرگە زور دەنساۋلىق، باق-بەرەكە تىلەيمىن! - دەلىنگەن قۇتتىقتاۋ ماتىنىندە.
مەملەكەت باسشىسى قازاقستان حالقىن رامازان ايىنىڭ باستالۋىمەن قۇتتىقتاعان بولاتىن.
