پرەزيدەنت اباي وبلىسىنىڭ اكىمى نۇرلان ۇرانحايەۆتى قابىلدادى
استانا. KAZINFORM - مەملەكەت باسشىسى اباي وبلىسىنىڭ اكىمى نۇرلان ۇرانحايەۆتى قابىلدادى.
پرەزيدەنتكە اباي وبلىسىنىڭ وتكەن جىلعى الەۋمەتتىك-ەكونوميكالىق دامۋ قورىتىندىسى تۋرالى باياندالدى.
قاسىم-جومارت توقايەۆقا بىلتىر ءوڭىر ەكونوميكاسىنا 568,9 ميلليارد تەڭگە ينۆەستيتسيا سالىنعانى جونىندە مالىمەت بەرىلدى.
بۇل ورايدا ءوسىم 132,7 پايىز بولسا، ونىڭ ىشىندە جەكە ينۆەستيتسيا كولەمى 131,5 پايىزعا ارتقان. جۇمىس ىستەپ تۇرعان شاعىن جانە ورتا كاسىپكەرلىك سۋبەكتىلەرىنىڭ سانى 107,1 پايىزعا ۇلعايىپ، 53,2 مىڭعا جەتكەن.
نۇرلان ۇرانحايەۆ 2023-جىلى ونەركاسىپ ءوندىرىسى 105,1 پايىزعا، اۋىل شارۋاشىلىعى ءوسىمى 103,5 پايىزعا، قۇرىلىس كولەمى 119,1 پايىزعا ارتقانىن ءمالىم ەتتى.
پرەزيدەنتتىڭ تاپسىرماسىنا سايكەس وبلىستا الەۋمەتتىك-ەكونوميكالىق دامۋدىڭ كەشەندى جوسپارى ىسكە اسىرىلىپ جاتىر.
جوسپاردا ينۆەستيتسيا كولەمى 1,9 تريلليون تەڭگە بولاتىن 102 جوبا قامتىلعان. «قاراجىرا» كەن ورنىندا كومىر-حيميا كەشەنىن جانە قۋاتى 1 گۆت بولاتىن ءۇشىنشى جەل ەلەكتر ستانتسياسىن سالۋ جوبالارى پىسىقتالىپ جاتىر.
شەكارا ماڭىنداعى ءوڭىرارالىق ىنتىماقتاستىقتى دامىتۋعا ەرەكشە كوڭىل بولىنەدى. ق ح ر- دىڭ شىڭجاڭ-ۇيعىر اۆتونوميالىق اۋدانىمەن بىرلەسە وتىرىپ، ينۆەستيتسيالىق جوبالار جانە شەكارادان وتكىزۋدىڭ ۋاقىتشا پۋنكتىن سالۋ تۋرالى ۋاعدالاستىققا قول جەتكىزىلدى.
ءوڭىر ءتۋريزمىنىڭ دامۋىنا سەرپىن بەرەتىن «سەمەي - تاچەن (شاۋەشەك)» اۋە رەيسىن اشۋ جۇمىستارى جۇرگىزىلىپ جاتىر. سونداي-اق تاتارستان رەسپۋبليكاسىمەن ىنتىماقتاستىقتى دامىتۋدىڭ جول كارتاسىنا قول قويىلدى.
مەملەكەت باسشىسىنا ءۇشىنشى جىلۋ ەلەكتر ورتالىعى قۇرىلىسىنىڭ تەحنيكالىق-ەكونوميكالىق نەگىزدەمەسىن ازىرلەۋ بارىسى جونىندە باياندالدى.
الدىن الا ەسەپكە سايكەس، جوسپارلانعان جىلۋ قۋاتى 1200 گكال/ساعاتتى جانە ەلەكتر قۋاتى 360 م ۆ ت- تى قۇرايدى. سونداي-اق ءوڭىر تۇرعىندارىن تازا اۋىزسۋمەن تولىق قامتاماسىز ەتۋ ءۇشىن 46 جوبانى ىسكە اسىرۋ قاراستىرىلعان.
«جايلى مەكتەپ» ۇلتتىق جوباسى اياسىندا 2025-جىلعا دەيىن 5700 وقۋشىعا ارنالعان 11 مەكتەپ سالۋ جوسپارلانعان.
«اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسىن ىسكە اسىرۋ شەڭبەرىندە 2025-جىلعا دەيىن وبلىستا العاشقى مەديتسينالىق-سانيتارلىق كومەك كورسەتەتىن 65 نىسان سالىنادى. ونىڭ قۇنى - 10,8 ميلليارد تەڭگە.
كەزدەسۋ سوڭىندا قاسىم-جومارت توقايەۆ وبلىستى ودان ءارى دامىتۋ جانە تۇرعىنداردىڭ ءال-اۋقاتىن ارتتىرۋ جونىندە ءبىرقاتار تاپسىرما بەردى.
