گرۋزيا پارلامەنتىنىڭ كوميتەتى شەتەلدىك اگەنتتەر تۋرالى زاڭ جوباسىن ءۇشىنشى وقىلىمدا ماقۇلدادى
استانا. KAZINFORM - گرۋزيا پارلامەنتىنىڭ قۇقىقتىق ماسەلەلەر جونىندەگى كوميتەتى شەتەلدىك اگەنتتەر تۋرالى زاڭ جوباسىن ءۇشىنشى جانە سوڭعى وقىلىمدا ماقۇلدادى.
كوميتەت وتىرىسى زاڭ شىعارۋشى ورگاننىڭ سايتىندا تىكەلەي ەفيردە كورسەتىلدى، دەپ حابارلايدى ت ا س س اقپارات اگەنتتىگى.
بايانداماشى كوميتەت باسشىسى انري وحاناشۆيلي بولدى. رەگلامەنتكە سايكەس، ءۇشىنشى وقىلىمدا زاڭ جوباسىنا رەداكتسيالىق تۇزەتۋلەر ەنگىزۋ كوزدەلگەن. ەشكىمدە رەداكسيالىق سيپاتتاعى پىكىر بولعان جوق. جوبا ءۇشىنشى وقىلىمدا جالپى وتىرىستىڭ قاراۋىنا جىبەرىلدى.
شەتەل اگەنتتەرى تۋرالى زاڭ جوباسىنا نارازىلىق بىلدىرۋشىلەر جەكسەنبىدەن بەرى كەزەكتى شەرۋ وتكىزىپ جاتىر. ولار 13-مامىر كۇنى تاڭەرتەڭ قۇقىقتىق ماسەلەلەر كوميتەتىنىڭ وتىرىسىندا دەپۋتاتتاردىڭ باستامانى ءۇشىنشى وقىلىمدا قاراۋىنا جول بەرمەۋ ءۇشىن رۋستاۆەلي داڭعىلىندا پارلامەنتكە بارىپ، تۇندە سوندا قالدى. دۇيسەنبى كۇنى تاڭعا قاراي پوليتسيا نارازىلىق بىلدىرۋشىلەردى پارلامەنت كىرەبەرىستەرىنەن ىعىستىردى.
گرۋزيا پارلامەنتى 1-مامىردا «شەتەلدىك ىقپالدىڭ اشىقتىعى تۋرالى» زاڭ جوباسىن ەكىنشى وقىلىمدا قولدادى. پرەزيدەنت سالومە زۋرابيشۆيلي، وپپوزيتسيا جانە باتىس ديپلوماتتارى وعان قارسى شىعىپ، ونى رەسپۋبليكانىڭ ەۋرووداققا ينتەگراتسيالانۋىنا كەدەرگى دەپ سانادى. اقش مەملەكەتتىك دەپارتامەنتىنىڭ مالىمدەۋىنشە، بۇل زاڭ جوباسى ەلدىڭ بەلسەندى ازاماتتىق قوعامىنا نۇقسان كەلتىرۋگە باعىتتالعان. بيلىكتەگى «گرۋزين ارمانى - دەموكراتيالىق گرۋزيا» پارتياسىنىڭ جەتەكشىلەرى بۇل تەك ۇكىمەتتىك ەمەس سەكتور مەن ب ا ق- تى شەتەلدەن قارجىلاندىرۋدىڭ اشىقتىعىن قامتاماسىز ەتۋ ماقساتىنا قىزمەت ەتەدى دەپ سانايدى. زۋرابيشۆيلي زاڭ جوباسى ءۇش وقىلىمدا دا قابىلدانسا، وعان ۆەتو قوياتىنىن مالىمدەدى.
15-ساۋىردەن بەرى وپپوزيتسيا مەن ازاماتتىق بەلسەندىلەر تبيليسيدە شەتەلدىك اگەنتتەر تۋرالى زاڭنىڭ قابىلدانۋىنا قارسى شەرۋلەر وتكىزىپ جاتىر. شەرۋلەر بىرنەشە رەت قاۋىپسىزدىك كۇشتەرىمەن قاقتىعىسقا ۇلاستى.
بۇعان دەيىن حابارلاعانىمىزداي، تبيليسيدە نارازىلىق بىلدىرۋشىلەر مەن وپپوزيتسيالىق بلوگەر ۇستالعان بولاتىن.
