گرۋزيا پارلامەنتىندە دەپۋتاتتار توبەلەسىپ قالدى

تبيليسي. kazinform - گرۋزيا پارلامەنتىنىڭ وپپوزيتسيالىق «ازاماتتار» پارتياسىنىڭ دەپۋتاتى الەكساندر ەليساشۆيلي شەتەل اگەنتتەرى تۋرالى زاڭ جوباسىن تالقىلاۋ بارىسىندا بيلەۋشى «گرۋزين ارمانى - دەموكراتيالىق گرۋزيا» پارتياسىنىڭ اتقارۋشى حاتشىسى، پارلامەنتتىك كوپشىلىكتىڭ جەتەكشىسى مامۋكا مدينارادزەمەن توبەلەسىپ قالدى.

وتىرىس زاڭ شىعارۋشى ورگاننىڭ سايتىندا تىكەلەي كورسەتىلدى.

ت ا س س اگەنتتىگىنىڭ حابارلاۋىنشا، مدينارادزە زاڭ جوباسىن ءبىرىنشى وقىلىمدا قاراعان پارلامەنتتىڭ قۇقىقتىق ماسەلەلەر جونىندەگى كوميتەتىنىڭ وتىرىسىندا دەپۋتاتتاردىڭ سۇراقتارىنا جاۋاپ بەرىپ تۇرعان. كەنەت وعان ەليساشۆيلي جۇگىرىپ كەلىپ، قولىمەن مدينارادزەنىڭ باسىنان ۇرعان. توبەلەسكە باسقا دەپۋتاتتار دا قوسىلىپ كەتكەن. كوميتەت وتىرىسىندا ءۇزىلىس جاريالاندى. سوت ورىنداۋشىلارى ەليساشۆيليدى ءماجىلىس زالىنان شىعارۋعا ءماجبۇر بولدى.

گرۋزيانىڭ باسقارۋشى پارتياسى ءساۋىر ايىنىڭ باسىندا «شەتەلدىك ىقپالدىڭ اشىقتىعى تۋرالى» زاڭ جوباسىن پارلامەنتكە قايتا ەنگىزۋ تۋرالى شەشىمىن وسىعان ۇقساس باستاما جاپپاي نارازىلىقتار تۋعىزعاننان كەيىن ءبىر جىل وتكەن سوڭ جاريالادى. زاڭ جوباسىنىڭ ماتىنىندە 2023-جىلعىداي «شەتەلدىك ىقپال اگەنتى» تەرمينىنىڭ ورنىنا «شەتەلدىك دەرجاۆانىڭ مۇددەلەرىنە قىزمەت ەتەتىن ۇيىم» تۇسىنىگى قولدانىلعان.

زاڭ جوباسىنا وپپوزيتسيا، پرەزيدەنت سالومە زۋرابيشۆيلي، سونداي-اق ديپلوماتيالىق كورپۋس، ونىڭ ىشىندە گرۋزياداعى ە و ميسسياسى مەن ا ق ش ەلشىلىگى قارسىلىق ءبىلدىردى. باستاماعا قارسىلاردىڭ پىكىرىنشە، زاڭ جوباسى گرۋزيانىڭ ەۋرووداقپەن ينتەگراتسيالانۋىنا كەدەرگى كەلتىرەدى.