پەريزات قايراتتىڭ ىسىنە قاتىستى تىڭ مالىمەتتەر پايدا بولدى

استانا. قازاقپارات - 2025 -جىلدىڭ 23- قاڭتارىندا پەريزات قايراتقا قاتىستى مۇگەدەك- بالالارعا ارنالعان وڭالتۋ ورتالىعىن سالۋعا اقشا جيناۋ الاياقتىعى بويىنشا سوتقا دەيىنگى جاڭادان تەرگەۋ تىركەلدى، دەپ حابارلايدى ق م ا.

قارجىلىق مونيتورينگ اگەنتتىگىنىڭ رەسمي وكىلى ەرنار تايجاننىڭ سوزىنشە، پەريزات قايرات 2021 -جىلدىڭ قاراشا ايىندا اقمولا وبلىسىندا «باتىر» قوعامدىق بىرلەستىگىنە وڭالتۋ ورتالىعىن سالۋ ءۇشىن اقشا جيناۋ ماقساتىندا قايىرىمدىلىق اۋكسيونىن ۇيىمداستىرعان. جۇرتتىڭ سەنىمىن ارتتىرۋ ءۇشىن وڭالتۋ ورتالىعىنا مۇقتاج مۇگەدەك-بالالار مەن ولاردىڭ اتا-انالارىن ءىس-شاراعا تارتقان. پ. قايرات تاراپىنان تاراتىلعان جالعان دەرەكتەر بويىنشا 48 ميلليون تەڭگە جينالىپ، قۇنى 100 ميلليون تەڭگە عيمارات سىيعا تارتىلعان. الايدا، اۋكسيون كەزىندە شىن مانىندە 22 ميلليون تەڭگە تۇسكەن، وسى اقشانى ول ءوزىنىڭ جەكە قاجەتىنە جاراتقان.

- سونىمەن قاتار، پ. قايرات «باتىر» قوعامدىق بىرلەستىگى ءۇشىن قۇنى 30 ميلليون تەڭگە جەر تەلىمىن ساتىپ العانىن مالىمدەگەن، الايدا بۇل ۋچاستوكتى 2019 -جىلى بىرلەستىك ءوزى ساتىپ العان. وڭالتۋ ورتالىعىنىڭ قۇرىلىسى ءالى باستالماعان قالپىندا تۇر. ورتالىقتىڭ قاجەتتىلىگىنە بەرىلدى دەگەن عيمارات مۇلدەم جوق بولىپ شىقتى. سوتقا دەيىنگى تەرگەۋ جالعاسۋدا. تەرگەۋ مۇددەسىنە بايلانىستى باسقا اقپارات جاريالانبايدى. ەگەر ءسىز قايرات پەريزاتتىڭ الاياقتىق ارەكەتتەرىنىڭ قۇربانى بولساڭىز، قازاقستان رەسپۋبليكاسىنىڭ قارجىلىق مونيتورينگ اگەنتتىگىنە مىنا مەكەنجاي بويىنشا حابارلاسۋىڭىزدى سۇرايمىز: استانا قالاسى، بەيبىتشىلىك كوشەسى، 10 نەمەسە 77172708478+، 708479 (قوسىمشا: 21384) تەلەفون نومىرلەرى ارقىلى، - دەپ ەسكەرتتى ۆەدومستۆونىڭ رەسمي وكىلى ەرنار تايجان.

وسىعان دەيىن پەريزات قايراتتىڭ ءىسى 100 تومنان اسىپ كەتكەنىن جازعان ەدىك.

سونىمەن قاتار سوت پەريزات قايراتتىڭ دۇنيە-مۇلكىنە شەكتەۋ قويعانى حابارلاعان ەدى.

اۆتور

اينۇر تۋماكبايەۆا