پەريزات قايراتتىڭ تۋىستارىنان دۋبايدان قۇنى 2,7 ميلليارد تەڭگەگە جۋىق جەتى پاتەر تابىلدى
استانا. KAZINFORM - پەريزات قايراتتىڭ ناعاشى اعاسىنىڭ وتباسى دۋبايدا جالپى قۇنى 5,9 ميلليون دوللارعا نەمەسە شامامەن 2,67 ميلليارد تەڭگەگە باعالانعان جەتى جىلجىمايتىن مۇلىككە يەلىك ەتەتىنى انىقتالدى، دەپ حابارلايدى ult.kz «ۆىحود ك موريۋ» تەلەگرام ارناسىنا سىلتەمە جاساپ.
دەرەككە سايكەس، پاتەرلەردىڭ بارلىعى قازاقستان ازاماتى گۇلبانۋ الاشبايەۆانىڭ اتىنا راسىمدەلگەن. ول پەريزات قايراتتىڭ اناسى عايني الاشبايەۆانىڭ تۋعان اعاسى ءسابيت الاشبايەۆتىڭ جۇبايى.
دۋبايداعى جىلجىمايتىن مۇلىك تىزىلىمىنە سايكەس، الاشبايەۆتار بۇل نىسانداردى 2020-2022 -جىلدارى ساتىپ العان. بۇل كەزەڭ پەريزات قايراتتىڭ قوعامدىق قىزمەتى باستالعان ۋاقىتپەن تۇسپا- تۇس كەلەدى.
ءسابيت پەن گۇلبانۋ الاشبايەۆتاردىڭ قازاقستاندا ءىرى كاسىپكەرلىك اكتيۆتەرى جوق. ولاردىڭ اتىنا استانا مەن اقتوبەدە ەكى جەكە كاسىپكەرلىك تىركەلگەن، ال وزدەرى ريەلتور بولىپ جۇمىس ىستەيدى.
باسىلىم مالىمەتىنشە، گۇلبانۋ الاشبايەۆانىڭ اتىنا دۋبايدا مىنا نىساندار تىركەلگەن:
Forte Tower II كەشەنىندەگى ەكى بولمەلى پاتەر. اۋماعى - 116,31 شارشى مەتر. قازىرگى باعاسى - 878,6 مىڭ دوللار؛
Vida Dubai Mall Tower II كەشەنىندەگى ءبىر بولمەلى پاتەر. اۋماعى - 74,8 شارشى مەتر. باعاسى - 750 مىڭ دوللار؛
سول كەشەندەگى ەكى بولمەلى تاعى ءبىر پاتەر. اۋماعى - 105,63 شارشى مەتر. باعاسى - 1,12 ميلليون دوللار؛
Bellevue Towers كەشەنىندەگى ءۇش بولمەلى پاتەر. اۋماعى - 119,59 شارشى مەتر. باعاسى - 735 مىڭ دوللار؛
Azure Residence كەشەنىندەگى اۋماعى 106 شارشى مەتر بولاتىن ەكى ءبىر بولمەلى پاتەر. ەكەۋىنىڭ جالپى قۇنى - 1,65 ميلليون دوللار؛
Harbour Views كەشەنىندەگى ەكى بولمەلى پاتەر. اۋماعى - 106,16 شارشى مەتر. باعاسى - 780 مىڭ دوللار.
بۇعان دەيىن الاشبايەۆاعا تيەسىلى بولعان Acacia at Park Heights كەشەنىندەگى پاتەر قىسقا مەرزىمدى جالعا بەرۋگە شىعارىلعان. جارنامادا بايلانىس رەتىندە ونىڭ ەلەكتروندى پوشتاسى كورسەتىلگەن. بۇل پاتەردى وتباسى 2020 -جىلى 380 مىڭ دوللارعا ساتىپ العان. كەيىن نىسان ساتىلعان، الايدا مامىلەنىڭ ناقتى سوماسى بەلگىسىز.
پەريزات قايراتتىڭ ءىسى بويىنشا 2025 -جىلى سوت ونى 10 جىلعا، ال اناسى عايني الاشبايەۆانى 7 -جىلعا باس بوستاندىعىنان ايىرعان. سوت ولاردى Biz Birgemiz Qazaqstan قورىنىڭ 3,5 ميلليارد تەڭگەسىن جىمقىرىپ، زاڭداستىردى دەپ تانىعان.
ولاردىڭ مۇلكى تاركىلەنىپ، جالپى قۇنى شامامەن 900 ميلليون تەڭگە بولاتىن ءتورت پاتەر، قىمبات كولىكتەر، بانك شوتتارىنداعى قاراجات، اشەكەي بۇيىمدار، برەندتىك كيىمدەر مەن سومكەلەر مەملەكەتكە وتكەن.
باسىلىم دۋبايداعى پاتەرلەردىڭ كەيىن تاركىلەنۋى مۇمكىن ەكەنىن جوققا شىعارمايدى. سونىمەن قاتار اۆتورلار بۇل جىلجىمايتىن مۇلىك الاشبايەۆتاردىڭ ريەلتورلىق قىزمەتتەن تاپقان كوميسسيالىق تابىسىنا ساتىپ الىنۋى مۇمكىن ەكەنىن دە اتاپ وتكەن. الايدا بۇل نۇسقا ازىرگە راستالماعان.
